Çalakwanê grevê vêşanîye H. Abdullah Kayayo ke 9’ê Çele ra nata hemverê tecrîdê serê Rayberê Şarê Kurdî Abdullah Ocalanî de grevê vêşanîye de yo seba kovara zîndanî Girave qisey kerd. Roportaj 30’ê Adare de kovara Girave de ame weşanayene.

H. Abdullah Kaya vano gama ke mi vatişê “şima nêeşkenê bi mîlyonan kesan hucreyan de bitepişê” yê Rayberê Şarê Kurdî Abdullah Ocalanî wend, seba ke ci rê bibo cewab û hem zî xokrîtîkkerdişêk hemverê 20 serrî tepişte mendişê Ocalanî de bido dest bi çalakîya grevê vêşanîye kerdo. Kaya vano ke o hêzê xo Ocalan, şehîdan û Têgêrayîşî ra û vîr û bawerîya serkewtişî ra gêno.

Kaya derheqê persa tirêm seba ê yeno çi mana ke grevê vêşanîye bi serkêşîya cinîyêk, hemsereka KCD’yî Leyla Guvene dest pêkerdo vano, “Embaze Leyla nê prosesî de baro giran wedart û bi serberzî rayîr ramojnena û serkêşîya xoverdayîşî kena. Ez bawer kena ke na serkêşîye do ma heminan biresno serfirazîye.”

Derheqê çalakîyanê fedaîyan ê ke zîndanan de hemverê tecrîdê serê Rayberê Şarê Kurdî Abdullah Ocalanî de ameyî kerdene de zî Kayayî nê vatî: “Çalakîyê embazan dereceya prosesî bewlî kerde. Gamê tarîxîyî şexsîyetanê tarîxîyan xo reyde anê. Hemra Zulkif, Aytene, Zehra û Medya, Ûgûr hem sembolê xoverdayîşî yê, hem zî şexsîyetê tarîxîyî yê, bîyê tarîx. Dewamê serkêşanê ma yê sey Mezlûm, kemal, Zîlan û Egîdan ê ke morê xo dabi tarîxî ro. Erey yan zî rew tecrîd do qetîyen biqedîyo. Ez qasê serê derzine nê ra guman nêkena.”

Xoverdayoxê grevê vêşanîye H. Abdullah Kayayî tewr peynî de vat, “Se beno wa bibo netîce do bêhempa bo. Gumanê mi nê ra qe çino, peynîya nê prosesî seke fermandar Çîyagerî zî seba xoverdayîşê xoserîye vatibi, “Netîce do bêhempa bo.”