Dîwanê Hemserekîye yê KCDK-E pê eşkerayîyêka nuştekîye venga pêro kurdîstanijan da ke 26ê hezîrane de tewrê çalakîya rayraşîyayîşî ya vera tecrîdê Îmraliyî û hêrişanê îşxalî bibê. KCDK-E vist vîrî ke 25ê hezîrane de çalakîya nobeta azadîye ya Strasbourgî dekewena serra 10.

KCDK-e pare kerd ke 26ê hezîrane de hemserekê KCDE, hemserekê dezgehan û temsîlkarê cinî û ciwanan çalakîya nobeta azadîye dewr bigêrê. KCDK-E vist vîrî ke çalakîya nobeta azadîye seba azadîya Rayberê Şarê Kurdî Abdullah Ocalanî yena kerdene û wayîra manayêka girîng a.

KCDK-E da zanayene ke çalakîya nobeta azadîye 26ê hezîrane de pê rayraşîyayîşêkî Place de la Republique 67000 de saete 11.00 de dest pêbikera.

KCDK-E vat: ''Vera tecrîdkerdişê Rayber Apoyî, vera hêrişanê îşxalî yê dewleta tirke yê serê Başûrê Kurdîstanî, vera qirkerdişê sîyasî yê serê HDPyî û vera polîtîkayanê qirkeran ê AKP-MHPyî ma 26ê hezîrane de do çalakîya rayraşîyayîşî ya pîle bikerê. Çalakîye 26ê hezîrane de do dest pêbikera û heta 4ê temmuze dewam bikera. Ma venga pêro temsîlkaranê dezgehanê Kurdîstanî û Tirkîya, roşnvîr, hunermend û sîyasetmedaran danê ke wa bi hawayêkê aktîfî verê Konseya Ewropa de tewrê çalakîya bibê.''