Hemserekîya Konseya Rayberişî ya KCKyî  veng da ke wa heme kurdî û dostê înan tewrê rayraşîyayîşê vera Qirkeridşê Parisî yê 6ê çeleyî bibê û têkoşînî xurtêr bikerê.

Eşkerayîya KCKyî de nê ameyî parekerdene:

''Şehadetê embazanê ma Sara, Rojbîne û Ronahî yê çeleyê 2013yî ser ra 11 serrî ravîyartî. Paris de hîrê cinîyê kurdî yê şorişgêrî ameyî qetilkerdene. Ma reyna nê qirkerdişî şermezar kenê û şexsê Sara, Rojbîne û Ronahî de heme şehîdanê şorişî û demokrasîyî bi rêzdarî yad kenê û sozê serkewtişî newe kenê.

Qirkerdişê Parisî sey dewamê komployê mîyanneteweyî ame kerdene. Bi nê qirkerdişî ame waştene ke wa verê têkoşînê azadîye bêro girewtene ke Ewropa de vila mebo û mereso şaranê bindestan û hetanê demokratîkan. Nê qirkerdişî de hîrê cinîyê Têgêrayîşê Azadîye yê Kurdîstanî ameyî hedefgirewtene. No hêriş vera xeta azadîye ya cinîyan ame kerdene.

Senî ke ma verî zî vatbi hetkarîya rêxistinanê îstîxbaratî yê dewletanê Ewropa ra nêbo,  dewleta tirke  nêeşkena xoser wina hêrişan bikero. Xora badê hêrişî tewirê Fransa û welatanê Ewropa na raştîye îspat kerde. Hetê bînî ra 23ê kanûna 2022yî de Paris de reya diyîne qirkerdişêko bîn ame kerdene û embazî Evîne Goyî, Abdurrahman Kizil û Mîr Perwerî şehîd bîyî. No zî mojeno ke dewletê Ewropa hemkarê qirkerdişanê dewleta tirke yê. 

Eke Qirkerdişê Parisî yê 9ê Çeleyê 2013yî biameyêne roşnkerdene, qirkerdişê Parisî yo bîn nêbîyênî. Dewleta Fransa berpirsîyara nê qirkerdişan a. Dewleta Fransa sûcdar a ke qirkerdişî roşn nêkerdî. Dewletê Ewropa yê bînî zî sûcdar ê. Ma serrgêra 11. ya Qirkerdişê Parisî de reyna veng danê dewleta Fransa ke wa qirkedişanê Parisî roşn bikero.

Eke Ewropa wazena wayîrê erjanê xo yê sey demokrasî, heqanê merdiman, edalet û huqûqî bivejîyo û bipawo, ganî vera qirkerdişanê Parisî vindero û paştî bido kurdan ke semedê roşnkerdişê qirkerdişan têkoşîn kenê. Şarê kurdî û dostanê ci heta ewro vera qirkerdişanê Parisî têkoşîn muhîm kerd û ewro ra tepîya zî têkoşîn bikerê. No tewirê şar û dostanê ma zaf muhîm o. Ewro ra tepişya ganî têkoşîn dahîna bêro xurtkerdene. Nê semedî ra ganî her kes tewrê rayraşîyayîşê 6ê çeleyî yê Parisî bibo û waştişê xo yê caardişê edaletî bîyaro ziwan.''