Hemserekîya Konseya Rayberdişî ya KCKyî bi eşkerayîyêke Roja Rûmetê Neteweyî ya 14ê Temmuze fîraz kerde ke seba vîrameyîşê şehîdanê Rojeyê Mergî yê Pîlî yê 14ê Temmuze amebi îlankerdene. 

Eşkerayîye wina ya:

''Ma dekewtî serrgêra 41. ya Xoverdayîşê 14ê Temmuze.Xoverdayîşê 14ê Temmuze çalakîyêka pîle û manadar bi ke binê îşkence, zulm û wehşetî de erjê merdimî pawitê. 

Nê xoverdayîşê pîlî mojna şarê ma û têgêrayîşê ma ke rayîrê tewirê raştî yê vera faşîzm û qirkerdişî senîn o. Ma averberdoxanê nê xoverdayîşê pîlî M. Hayrî Durmuş, Kemal Pîr, Akîf Yilmaz û Alî Çîçekî bi minet û rêzî serrgêra şehadetanê înan de yad kenê. Ma şexsê nînan de pêro şehîdanê demokrasî û têkoşînî zî reyna yad kenê û soz danê înan ke armancanê înan bîyarê ca. Sere de Rayber Apoyî ma pêro xoverdayoxanê zîndanan selam kenê. Reyna ma gerîlayanê ke bi ruhê 14ê Temmuze şer kenê, şarê ma yê Kurdîstanî, dostanê xo û pêro xoverdayoxan selam kenê.

Xoverdayîşê 14ê Temmuze vera zulmî, wehşet, îşkence nimûneyê qehremanî, cesaret û fedakarîye yo û nimûneyê perwerîya bi cuya azade û erjanê merdimatîye yo. Xoverdayîşê 14ê Temmuze çîyo nemumkîn kerd mumkîn. Xoverdayoxê 14ê Temmuze pabesteyê dewaya Kurdîstanî û xeta têkoşînî ya PKKyî bîye. Coka nînan qetî tewirê xo ra tawîz nêda û xeta xoverdayîşê PKKyî temsîl kerde. Seba ke ma Xoverdayîşê 14ê Temmuze hîna hol fam bikerê ganî xoverdayoxanê ci zî hol fam bikerê û bişinasnê.

12ê êlula 1980î de Tirkîya û Kurdîstan de vera têgêrayîşê şorişgêran darbe ameye kerdene. Darbeya 12ê Êlule armanc kerdêne ke komel bigêra binê teda û şîdetî. Coka îdareyê Darbeya 12ê Êlule kerd ke mîyanê şorişgêran de poşmanîye û îtîrafkerîye vila bikero. Cunta naye ra pê şîdet û îşkenceyî kerd ke verê şorişgêran bigêra û zîndanan de şorişgêrî qetil kerdî. Zîndanê Dîyarbekîrî zî merkezanê cunta ra yew bi. Zîndanê Dîyarbekîrî de vera kadroyanê PKKyî, sempatîzanan û welatperweranê kurdan îşkence ame kerdene û no îşkence teyna bi karakterê dişmenîye yê dewleta tirke yeno îfadekerdene. 

Xoverdayîşê Zîndanê Dîyarbekîrî seba ke armancê Cuntaya 12ê Êlule pûç bikerê û hêvîya azadîye ya şarî bipawê ameyî kerdene. Nê xoverdayîşan Mazlûman ra dest pê kerd û heta Çaran konseptê tasfîyekerdişî pûç kerd. Nê xoverdayîşî tesîrê teberê zîndanî zî kerd, hêvîya şarî zêdînaye û hîsê wayîrvejîyayîşî aver berd.  Bi nê hawayî Xoverdayîşê 14ê Temmuze derbêka pîle daye rejîmê 12ê Êlule û rejîmo faşîst bin vist.

Çalakîya 14ê Temmuze terzê têkoşîn û xeta xoverdayîşî ya PKKyî îfade kena. Rayber Apoyî Xoverdayîşê Rojeyê Mergî yê Pîlî sey çalakîya rûmetî, caardişê xeta xoverdayîşî ya PKKyî îfade kerd û esas girewt. Rayber Apoyî pê caardişê Hemleya 15ê Tebaxe xeta 14ê Temmuze berde astêka bîne û  pê gandarbîyayîşê kurdan rejîmê 12ê Êlule bin vist. Ewro xoverdayîşê gerîlayan û têkoşînê şarê kurdî yê vera faşîzmê AKP-MHPyî xeta 14ê Temmuze de yenê kerdene. Bêhuman eke Kurdîstan de qewimîyayîşêk  bêro averberdene no do xeta 14ê Temmuze de xorin bibo.

Îqtîdarê AKP-MHPyî dewamê rejîmê 12ê Êlule yo. Sey rejîmê 12ê Êlule AKP-MHP zî qirkerdişê kurdan xo rê keno esas. Tecrîdê vera Rayber Apoyî û hêrişê bînî zî na çarçewe de yenê kerdene. Ma vera nê hêrişan mîyanê têkoşînêkê bêmabênî de yê. La seba ke ma rejîmê AKP-MHPyî bin bivisnê ganî hîna zaf têkoşîn bikerê. No zî pê xorinkerdişê xeta 14ê Temmuze, esaskerdişê ruh û terzê Xoverdayîşê 14ê Temmuze mumkîn o. Senî ke Xoverdayîşê 14ê Temmuze rejîmê 12ê Êlule bin vistbi ma zî bi pîlkerdişê têkoşînî do AKP-MHPyî bin bivisnê. Faşîzm qetî nêeşkeno şarê kurdî, hêzanê demokrasî, wijdanê merdimatîye û rûmetê ci teslîm bigêro.

Ma reyna xoverdayoxanê 14ê Temmuze bi rêz û minetî yad kenê. Nê xoverdayoxan îfade kerdbi ke ê deyndarê şarê kurdî yê. Nê qiseyî karakterê nê şorişgêranê pîlan eşkera kenê. Ganî pêro kurdî, welatperwerî û şorişgêrî wayîrê nê qiseyan vejîyê û bibê layîqê nê xoverdayoxan. Nê esasî ser o ma venga pêro kesan danê ke xeta 14ê Temmuze hîna hol fam bikerê, tede xo xorin bikerê û têkoşînî pîlêr bikerê. Ma bi nê hawayî Roja Rûmetê Neteweyî ya 14ê Temmuze fîraz kenê.''