Komîteya Şar û Bawerîyan a KCKyî bi eşkerayîyêke şexsê xirîstîyananê Kurdîstanî de Roşanê Noelî yê pêro komelê xirîstîyanan fîraz kerd.

Eşkerayîye wina ya:

''Çend rojan ra Noelî ra dima dinya do bikewa serra newî ya mîladîye. Bi wesîleya na roje ma serra newîye sere de pêro kurdîstanijan rê merdimatîye rê fîraz kenê. Ma hêvî kenê ke serra 2024î do biba serrêka winayêne ke tede meseleyê bingeyî yê Rojhelatê Mîyanênî û dinya do çareser bibê, şer biqedo, merdimatîye mîyanê haştî, aramî û weşîye de cuyêka azad û demokratîkî bivisna destî.

Rojhelato Mîyanêno ke xirîstîyanîye tira vila bîya, bi şerê giranî, tecrîd, îşkence û hêrişanê qirkerdişî derbazê serra 2024î beno.Nê hêrişan de sere de kurd û erebî şarê Rojhelatê Mîyanênî zeraranê pîlan vînenê û derban wenê. Ma hêvî kenê û pawenê ke Roşanê Noelî do bibo wesîle ke şer biqedo, tecrîd wedarîyo, haştî û wayûbiratîye bêrê.

Sey Têgêrayîşê Azadîye yê Kurdan ma pê bawer ê ke meseleyê komelanê Rojhelatê Mîyanênî û merdimatîye bi têkoşînê exlaqî, rêxistinîye û ferasetê polîtîkî eşkenê bêrê çareserkerdene. Ma zanenê ke têkoşînê demokrasî yê şaran tek rayîrê felate yo. Bi na bawerî ma venga hêzanê demokrasî, komelkî û azadîgîran danê ke seba ke Roşanê Noelî yo emserîn û serra mîladî ya newîye bibê serra azadîye û demokrasî têkoşînê xo berzêr bikerê.

Ma venga merdimatîye danê ke serra 2024î de Kurdîstan, Rojhelatê Mîyanênî û her cayê dinya de vera hukmat û dewletanê kolonyalîst, qirker û faşîstan cepheyê têkoşînê hemparî de bi xurtî tewrê têkoşînê rêxistinbîyayeyî biba. Serra newîye de sey şaranê Rojhelatê Mîyanênî û dinya her wextî ra zafêr ma hewceyê paştdayîşî yê. Ma hêvîdar ê ke Roşanê Noelî do biba wesîle ke Rojhelatê Mîyanênî û şarê Kurdîstanî do têkoşînê xo xeta neteweya demokratîke de pîlêr bikerê, hîsanê yewîye, paştdayîş û wayûbiratîye hîna xurtêr bikerê.

Bi nê hîs û fikran ma Roşanê Noelî sere de şarê ma yê armenî, asûrî, sûryanî, keldanî yê Kurdîstanî rê pêro komelê xirîstîyanan rê fîraz kenê. Ma hêvî kenê ke serra 2024î seba her kesî biba serrêka heskerdişî, haştî û wayûbiratîye.''