Keyeyê Şenyaşarî roja 102. de nobeta xo ya edakeyî berde Dîlok. Keyeyê Şenyaşarî hînî hewte de rojêke nobeta xo do bero şaristananê cîyayan û partî, rêxistinan zîyaret bikero.

Keyeyê Şenyaşarî verî şi Dîlok. Keye do Baroyê Dîlokî, Komeleya Heqanê Merdiman a Şubeyê Dîlokî, Partîya Ameyoxî, Partîya DEVA, Partîya Saadetî û HDPyî zîyaret bikero û înan ra paştdayîş biwazo. 

Keyeyî hesabê xo yê twitterî ser o zî pê hashtagê #ŞenyaşarAilesiAdaletİstiyor (Keyeyê Şenyaşarî edaletî wazeno) no mesaj da: ''Têkoşînê ma yê edaletî roja 102. de yo. Ma wazenê têkoşînê xo Tirkîya de bidê eşnawitene. Ma do Baroyê Dîlokî û dezgehanê bînan zîyaret bikerê. Ma do her ca de qala cigêrayîşê xo yê edaletî bikerê. Çunke edalet encax o çax do bêro cardene û zulm do biqedo.''