Hepisxaneyan de  bi hezaran girewteyî grevê vêşanîye de yê û keyeyê nê girewteyan ra tayî  seba ke Wezîrê Edaletî de pêvînayîş bikerê şîyî Enqere. Keyeyanê girewteyan ra 8 kesî ameyî Wezîrîya Edaletî la seba ke randevuyê înan çin o ameyî redkerdene. Mabênê keyeyan de Dayîkê Haştîye zî bîyî û Şûbeyê ÎHD’yî yê Enqere de kombîyayîşê çapemenîye viraşt.

5 kesî rîyê bêvênîya dewlete ra merdî

Waya Yuksel Koçî yo ke  101 rojî yo ke Fransa de grevê vêşanîye de yo, Cahîde seba ke grevê vêşanîye û tecrîd bêro wedaritene bi keyeyanê binan şîye Wezîrîya Edaletî. Yildirime wina va: ”Ma di rojîyo kenê ke wezîrê edaletî bivînê. La seba ke teberê bajarî de bi, ma polîsanê ucayî de pêvînayîşî kerdî û înan zî va ma dest ra çiyêk nêno. No edaletê çiyî yo, edalet dî no bi  kamî…. Ma veng danê la dewlete vengê ma nêheşnena. Heta ke talebê ma bêrê qebulkerdene, ma do verê awanîye de ronîşê. Birayê mi 101 rojî yo ke grevê vêşanîye de yo. Ewro seba ke weçînayîş esto vengê hepisxaneyan nêheşnenê. 5 kesî bêvengîya dewlete ra merdî. No senî edalet o?”

Rewşe giran a wa tecrîd bêro wedartene

Maya Newroz Bozkurte ya ke 21 serrî yo ke hepisxane de ya û 8’ê Adare ra nata grevê vêşanîye de ya, Sultan Bozkurte wina qisey kerd: “1’ê Adare ra nat 7 hezarî ra zêde girewteyî grevê vêşanî,ye de yê. Rewşa çalakwanan resta asta krîtîke. Ganî tecrîd bêro wedaritene. Ma wazenê ke Wezîrê Edaletî de qisey bikê. Tirkîya de nameyê edaletî esto la o bi xo çin o. Şima ke dayîkan ra bipersê vajê şima çi wazenê, dayîkî do vajê ma haştîye, edalet û azadîye wazenê. Ma seba domananê xo ameyê tîya. Seba dayîkan dîn, ziwan, netew ferq nêkeno. Wa vengê domananê ma biheşnê. Hepisxaneyan ra cenazeyi vejînê, vêşanîye ra nê, xo feda kenê.”

CPT wa vera mergan bêvêng memano

Lajê Sakîne Goregene zî Hepisxaneyê Maltepe de grevê vêşanîye de yo û Sakîne Goregene zî seba ke Wezîrê Edaletî de qisey bikero ameya Enqere. Goregene seba ke tecrdî bêro wedaritene venga CPT’yî da û va ma nêwazenê ewro ra dima kes bimiro.

Munube Koçe zî seba ke pêvînayîşan bikero ameya Enqere. Birayê aye zî Hepisxaneyê Patnosî de grevê vêşanîye de yo û Koçe wina vana: ”Tecrîd ke bêro wedaritene, girewteyî do çalakîya xo terk bikerê. Domanê ma çalakîya fedaîyîye kenê, wa mekerê. Wezîrê Edaletî ma qebul nêkerdî û polîsan dormeyê ma girewt, no zî tecrîd o. Êdî tecrîd her ca de esto.”