Keyeyê tepişteyan: Wa tecrîd cade bêro wedaritene

Amed de dayîkê ke qicê înan grevê vêşanîye de yê veng da ke wa cade tecrîd bêro wedaritene ke zîndanan ra cenazayî mevejê.

Grevê vêşanîye yo ke zîndanan de vera tecrîdê serê Rayberê Şarê Kurdî Abdullah Ocalanî  dîya destpêkerdene kewt roja 251ine. Dayîkanê tepişteyanê ke grevê vêşanîye de yê Şubeyê Komeleya Heqanê Merdiman (ÎHD) a Amedî de eşkerayîye daye.  

Serekê ÎHDyî yê bajarî Abdullah Zeytunî vist vîrî ke problemê zîndanan bi zêdîyayîşî dewam kenê û vat: ''Ganî binpaykerdişê heqanê ke zîndanan de yenê kerdene  goreyê mevzuatanê mîyanneteweyî û krîteranê huqûqî bêrê çareserkerdene. Pîya bi tecrîdê giranî yê Îmraliyî zîndanan de zextê giranî estê. Semedê wedartişê binpaykerdişê heqan û heme probleman ganî tecrîd cade bêro wedaritene. Hema ke rewşa tepişteyan zaf girane nêbîya ganî cade problem goreyê huqûqî bêro çareserkerdene.''

Dayîke Nafiye Yigite zî bale ante ser ke serê qicanê înan de zextê giranî estî û vat: ''Qicanê ma rê heqeret kenê. Xora seba ke keyeyanê ci ra dûrî de yenê tepiştene, ma nêeşkenê şirê vînê. Gama ke ma rê telefon kenê  vanê ê raştê zextî yenê.  Ê leteyê ganê ma yê. Ma tim  peyê patîya înan de yê. Bi serran o ma semedê haştîye veng danê. Ma nê wazenê kes/e bimiro. La rixmê heme vengdayîşanê ma çew/e destê haştîye derg nêkeno. Vengdayîşê ma nêno qebulkerdene. No waştiş goreyê hesabanê înan nîyo.  Bi serren o tecrîd yeno domnayene. Wa waştişê qicanê ma bêro caardene. Ê qerardar ê heta waştişê înan nêro ca, çalakîya xo do bidomnê. Ma veng danê Wezîrîya Edaletî, Wezîrîya Karanê Zereyî, Serekwezîrî, Serekkomarî wa destê bidê vîjdanê xo ser. Ma nêwazenê wa zîndanan ra cenazayî vejê. Destê ma yê haştîye hewa de meverdê. Wa no zulm û heqerat biqedîyê. Waştişê qicanê ma bêro ca.''