Hemşaredara Amedî Gultane Kişanaka ke herinda ci de qeyûm amebi tayînkerdene û 2016 de tepişîyabî, rixmo ke cezaya ci qedîyaya vera nêdîyena.

Gultane Kişanak Zîndanê Sîncanî ra cewab da persanê ANFyî.

Gultane Kişanak bale ante tecrîdê Îmraliyî ser û ard ziwan ke no tecrîd hînî vilayê pêro zîndanan bîyo. Kişanake vat: ''No tecrîd tedaya vera kurdan de rolêkê pîlî kay keno.  Wexto ke sîyasetê kurdan o demokratîk sey 'terorîstî' ame îlankerdene, temsîlkarê kurdî tepişîyayî, qeyûmî ameyî tayînkerdene û xebatê serê haştîye sey sûcî pênase bîyî çewî verê nînan de îtîraz nêkerd. Bi nê hawayî bêhuqûqîyî zêdîyayî. Welatêk de eke meseleya demokrasî û azadîye est ba no hêverî zîndanan ra aseno.''

Kişanake da zanayene ke têkoşînê demokrasî û sîyaseto demokratîk o yewbîyaye bi vervejîyayîşê tecrîdî benê û vat: ''Çunke tecrîdê Îmraliyî ewro vilayê her cayî bîyo. Tepişteyê sîyasîyî hucreyê yewkesî de tepişîyenê. Rixmê raporanê CPTyî zî 'heqê hêvîye' yê tepişteyan yeno binpaykerdene. Tepişteyê nêweşî terkê mergî yenê kerdene. Tepişteyê ke înfazê înan qedîyayê vera nêdîyenê. Îqtîdar seba ke komelî bêveng bikero bernameyêkî ano ca. Tecrîdê Îmraliyî zî parçeyêkê nê bernameyî yo. Birêz Ocalanî de pêvînayîş bi qedexe û bahaneyan yeno astengkerdene.''

Kişanake kerdişê qeyûman vistî vîrî û pare kerd ke heta ke qanûnî erkî danê rejîmê qeyûman şaredarîyêka partîyanê muxalefetî asayî nîya.