Konseya Rayberdişî ya Kongreya Neteweyî ya Kurdîstanî (KNK) bi wesîleya weçînayîşanê Parlamentoyê Herêma Kurdîstanî eşkerayîyêke daye.

KNKyî vat: ''Weçînayîşî prosesêkê krîtîkî de yenê kerdene ke verê cû dewrêko hende alozî nêbibi. Krîz û meseleyan reyde mudaxeleyê leşkerî, asayîş û kaosî herême de est ê. Başûrê Kurdîstanî de nê û babetê bînî îdareyê Başûrî eşkera kenê.

Tewirê hukmatê Iraqî yê vera Herêma Kurdîstanî dostanî nîyo û beno ke hukmatê Iraqî xîret bikero ke statoyê Başûrî destî ra bigêro. Referandumê 2017î ra nata herême de vurnayîşê demografî dewam keno. Hetê bînî ra hukmatê Iraqî dewleta tirke de peymanan virazeno, partîyanê kurdan qedexe keno, destûrê îşxalî dano û vera kurdan hesaban keno. Hukmatê Iraqî plan keno ke menga teşrîna peyêne de yekser weçînayîşan ra dima hûmaritişê nufusî bikero 

Nînan ra ber babetêka tewr girînge zî na ya ke dewleta tirke Başûrê Kurdîstanî îşxal kena. No îxşal û hêrişî bi awankerdişê baregehan, çekanê qedexeyan dewam kenê. Tirkîya herêmêka Behdînanî ya pîle îşxal kerda û seke wayîra erdî ya tîya de têgêrena. 

La şarê kurdî zî ancî wayîrê hêvî yo. Weçînayîşê şefaf û duristî zî parçeyê nê hêvî yê. Weçînayîşê Başûrî rewşêka nazik, hesas û eşkera de yenê kerdene. Ma sey KNKyî tim seba yewîya kurdan veng danê. Ma wazenê nê prosesê weçînayîşî zî bi aramî bêrê kerdene. Ma zanenê ke şarê Başûrî bi hişmendî do raya xo bido. Ma pê bawer ê ke şarê ma bi raya xo destkewteyanê xo bipawo û raya xo bido welatperweranê vera îşxalkeran. 

Bi na wesîle ma sey KNKyî ancî veng danê ke

Nê weçînayîşî zaf girîng ê. Ganî şarê ma şoro sindoqan ser, raya xo bido namzedanê welatperweran ê vera îşxalkeran.

Ganî weçînayîşî bi hawayêkê zelalî bêrê kerdene, hîleyî nêrê kerdene.

Ganî pêro terefê sîyasîyî tewrê weçînayîşan bibê, mesaj û propagandaya xo bikerê û ziwanêkê heqaretî nêşuxilnê. 

Ganî pêro hêzî netîceyanê weçînayîşan rê hûrmet bikerê û goreyê netîceyanê weçînayîşî hukmatê demokratîkî bîyarê îdareyî ser.''