Hemserekanê KCDK-E  Fatoşe Goksungur û Yuksel Koç û Vervatoxa TJK-E Aytene Kaplan derheqê weçînayîşan de ANFyî rê qisey kerd.

Hemsereka KCDK-E Fatoşe Goksungur îfade kerd ke narey weçînayîşî seba rijnayîşê AKP-MHPyî firsend ê û vat: ''Ganî kurd, armenî, tirk, azerî, çerkez, elewî û ê kesê bînê ke Ewropa ra do raye bidê nê weçînayîşan sey normalî pênase nêkerê. Nê weçînayîşan de ya ma raya xo bidê azadîye yan zî bidê dîktatorîya AKP-MHPyî.  Ganî her kes bêro îqnakerdene ke şoro sindoqan ser. Her raya ke ma do bidê Îtîfaqê Kede û Demokrasî do rayîrê azadîya cinîyan abikera. Ma do raya xo bidê Partîya Çep a Keske û dîktatorîya AKP-MPyî ya zorbaze bin bivisnê.''

Hemserekê KCDK-E Yuksel Koçî ard ziwan ke nê weçînayîşî zaf stratejîk ê û qederê welatî bivurnê. Koçî vat: ''Nê weçînayîşan de ma do bire bidê ke seserra diyîne ya Komare bi înkar û îmhaya kurdan derbaz biba yan nê. Nê weçînayîşan de çarenûsê şarê ma do eşkera bibo. Ewropa de 3.5 mîlyon weçînitoxî est ê. 27ê nîsane ra heta 9ê gulane şarê ma eşkeno Ewropa de raya xo bido. Ganî ma raya xo bidê Partîya Çep a Keske. Ganî seba cuyêka demokratîke û azade, cuyêka têdûşte û bawerî û nasnameyê xo her kes raya xo bido partîye. Wa her kes tewr tay 10 merdimanê xo yan zî dostanê xo îqna bikero ke raya xo bidê Partîya Çep a Keske.'' 

Vervatoxa YJK-E Aytene Kaplan zî venga weçînitoxanê Ewropa da ke raya xo bidê û vat: ''Ma venga pêro weçînitoxanê Ewropa danê. Bi taybetî seba vurnayîşî, demokrasî, heqanê merdiman, azadîya fikrîye ganî raya xo bidê Partîya Çep a Keske. Çunke bi her raye çîyêk vurîyeno. Eke ma wazenê teda, ters û tarîye wertî ra wedarîyê ganî ma raya xo bidê Partîya Çep a Keske û vurnayîşî bikerê. Girseyê ma ganî hem Ewropa de hem zî welat de raya xo bidê.''