Tirkîya de nêzdîyê serrêk o bi taybetî destûrê roniştiş û xebate yê koçberanê afrîkayîjan yenê betalkerdene. Nê koçberê afrîkayîjî seba ke tedayanê dewlete ra xo bixelisnê bi hawayêkê qeçaxî ciwîyenê û neçare manenê ke bikewê binê fermanê çeteyan.

Goreyê doneyanê fermîyan ê serra 2021î Tirkîya de 100 hezar koçberê afrîkayîjî est ê. Se ra 70ê înan Îstanbul de ciwîyenê. 

Koçberê ugandayîjê ke Uganda ra remenê Tirkîya de neçare menanê ke çeteyê ke mîyanê înan de selahîyetdarê ugandayîjî est ê, nînan de şîrîkîya bikerê û waştişê nînan bîyarê ca. Bi taybetî weçînayîşan ra dima wexto ke hêrişê vera ugandayîjan zêdîyabi eşkera bibi ke hêzê dewlete û sersefîrîya Uganda pîya ugandayîjan rê fuhuş ferz kenê. 

Çeteyî koçberan ê cinîyan ê ugandayîjan hedef kenê. Ma nê cinîyan de qisey kerd. Nê cinîyanê ke nêwaşt name û rîyê înan eşkera bibê, ANFyî rê qale kerd ke çi ameyo înan ser.

M.ya ke kewta destê çeteyan vat: ''Kaosê Uganda ra mi muracatê sersefîrîye kerd, vîze girewt û ameya Tirkîya. La dima ke ameya Tirkîya Sersefîrîya Uganda venga mi da û vat ke ê derheqê belgeyanê roniştişî de qisey bikerê. Sersefîrîye de kesêkî mi ra vat ke ganî ez fotografanê xo yê rûtan bianca û bidê nînan, nêbo Tirkîya vîzeyê mi betal bikera. Mi fotografî girewtî û şawitî. Dima Komeleya Komîteya Uganda venga mi da. Uca de nînan fotografê min ê rûtî mojnayî mi û vat ke eke ez vateyê înan nêkera do pasaport nêdê mi û gerreyê mi bikerê. Înan mi rê 100 dolar waşt. Wexto ke mi vat ke ez nêeşkena bi rehetî 100 dolar qezenç bikera înan vat ke eke ez fuhuş bikera eşkena pasaportê xo bigêra.''

Wexto ke ma Komeleya Komîteya Uganda cigêrayê ma dî ke resmîyet de komeleyêka winayêne çin a. La na komele hetê xeylêk hemwelatîyanê ugandayîjan ra zanîyena û bi hawayêkê akerdeyî xebitîyena.

Cinîyêka bîna ke ma tede qisey kerd da zanayene ke wexto ke a digane bîya kewta destê çeteyan. Cinîye îfade kerd ke rixmo ke a digane bîya ci rê fuhuş ameya ferzkerdene. Na cinîye zî zaf xîret kerd ke pasaportê xo apey bigêra la hema zî nêeşkaya. 

Koçberanê ke dest nîyayo pasaportanê nînan vat ke wexto ke bê pasaportî bibê nêeşkenê abigêrê welatê xo û neçare manenê ke wextêkê dergî Merkezê Açarnayîşî de bimanê.