HDP do ewro Merkezê Bazirganîye yê Anqara de Kongreya Îstîsnayîye ya Çarine bikero. Kongre de do rêzename bêro vurnayene, hûmara endamanê Meclîsê Partîye bêra kêmkerdene. Dîya zanayene ke kongre de Sultane Ozcan û Cahît Kirkazak seba hemserekîya HDPyî bîyê namzet.

Wekîlê HDPyî yê verênî Kemal Bulbulî derheqê kongre de ANFyî rê qisey kerd. 

Bulbulî ard ziwan ke konferans û kombîyayîşanê şarî de bi taybetî tecrîdê vera Rayberê Şarê Kurdî Abdullah Ocalanî ame nîqaşkerdene. Bulbulî vat: ''Konferans û kombîyayîşanê şarî de asta berze de ercnayîş û pêşnîyazî ameyî kerdene. Meseleyê herêmî, meseleyê partîye, metodî, têkilîyê bi şarî û merkezî û netîceyê weçînayîşî ameyî ercnayene. Bi konferans û kombîyayîşanê şarî ma do xerîtaya prosesê verê ma dîyar bikerê û no proses gamêka pîl a. Pêşnîyazê nê prosesî qetî do tesîrê kongre bikerê.''

Bulbulî da zanayene ke weçînayîşan ra dima înan şarî reyde, dezgehan reyde bi beşdarîya HDP, Partîya Çep a Keske, DBP û Kongreya Komelê Demokratîkî pêvînayîşê cîdîyî kerdî. Bulbulî vat: ''Rojdemê ma yê girîngî nê bîyê ke çira ma çareserîya meseleya kurdan de hîna zaf aktîf nîyê û tecrîdê Îmraliyî senî şikîyeno. Ma do nê meseleyan bikerê babeta kongre. HDP rixmê teda û zorbazîye zî do têkoşînê xo rê dewam bikero. Dewaya qefilnayîşê HDPyî hema nêqedîy. Ma do seba ney tewirê xo zî eşkera bikerê. Nameyê Partîya Çep a Keske kongre de do bivurîyo. Ma do bi meclîsê partîye yê neweyî, bi heyetê îdareyê merkezî yê neweyî û hemserekanê pêroyîyan ê neweyî xoverdayîşî rê dewam bikerê.''