Kombîyayîşanê şarî ra dima komxebat û kargehê HDP û Partîya Çep a Keske zî qedîyayî.

Menga tebaxe de Partîya Çep a Keske û HDPyî pîya di komxebatî û 5 kargehî kerdî. Temsîlkarê Îtîfaqê Kede û Azadîye, akademîsyenî, endamê Heyetê Şêwirmendîye yê HDPyî, îdarekarê partîye û şar tewrê nînan bîyî.

Kargeh û komxebatan de pêşnîyazê nuştekîyî ameyî kerdene û bire dîyaye ke xebatê Îslamê Demokratîkî bêrê vilakerdene, erjê komelî bêrê esaskerdene. 

Kargehanê bawerîyan de ame pêşnîyazkerdene ke seba elewîyan şertê rêxistinîye yê azadî bêrê afernayene û têkoşînê seba hemwelatîya têdûşte bêro berzkerdene.

Komxebatan de bire dîyaye ke serkêşîya Îtîfaqê Kurdîstanî, Partîya Herêmanê Demokratîkan (DBP) û Kongreya Komelê Demokratîkî de hemleyêka newîye bêra awankerdene. Pêşnîyazan de ame parekerdene ke HDP û Partîya Çep a Keske pîya do derheqê çareserîya meseleya kurdan de biranê girîngan bigêrê.

Nîqaşan de ame parekerdene ke Îtîfaqê Kede û Azadîye teng mendo û ganî îtîfaq dewrê neweyî de seba ke serkêşîya muaxalafetî bikero xetêka sîyasîye awan bikero. 

Rexne, pêşnîyaz û fikrê ke kombîyayîşanê şarî, komxebatan û kargehan de vejîyayê vernî, do sey raporî pêşkêşê komîsyonê kongre bêrê kerdene û xeta polîtîke ya îdareyê neweyî yê partîye eşkera bikerê.