Komîsyonê Hemwelatîyan ê Yewîya Ewropa-Tirkîya (EUTCC) Parlamentoyê Ewropa de Konferansê Kurdan ê 18. organîze kerd. Konferansê di rojan vizêr dest pêkerd.

Konferansê mîyanneteweyî yê 18.  yo ke bi sernameyê ''Yewîya Ewropa, Tirkîya, Rojhelatê Mîyanênî  û Kurdan'' ame organîzekerdene, roja verêne de qiseykerdişê akerdişî û panalêk ame kerdene. Emser zafêr qiseykerdoxê konferansî cinî yê.

Hemsereka EUTCCyî û akademîsyena Unîverstîteya Bergenî Kariane Westrheima  norveçije bale ante hêrişanê dewleta tirke yê vera Rojawan û Başûrê Kurdîstanî ser û vat, ''Nê hêrişî benê sebebê qesawtanê girdan. Seba ke vera nê hêrişan veng nêvejîyeno hêrişî dewam kenê. Şarê kurdî hewceyê paştdayîşê mîyanneteweyî yo. Ganî ma hêzê xo bikerê yew. Ganî Raybero Kurd Abdullah Ocalan serbest bêro veradayene. Ronayîşê PKKyî ra nata Abdullah Ocalan tim haştîye wazeno û semedê nê xebityeno. Eke yew hetê hîrêyinî semedê muzakerayan vejîyo werte, bêno ke haştîye mumkun bo. Ma veng danê Parlamentoyê Ewropa ke wa paştî bido nê vîzyonî û na çarçewa de bixebitîyo.''

Hetkarê Serekî yê Parlamentoya Ewropa Dimitrios Papadimouliso yunanîstanijî vat zî seba ke Tirkîya de dîyalog newera  bêro destpêkerdene ganî PKK lîsteya têrorî bêro vetene.

Îtîfaqê Averperweran ê Sosyalîst û Demokratan ra  Parlamenterê Parlamentoyê Ewropa Andreas Schiedero avusturyayijî zî vist vîrî ke rewşa Tirkîya senî xirab a û vat, '2Heta ke Ocalan zîndan de bi huqûq çîn o. Azadîya Ocalanî azadîya şaran a.''

Badê qiseykerdişanê akerdişî panel ame kerdene. London School of Economics and Politicsî ra  Ayça Çubukçu moderatorîya panelî kerd.

Sekreterê Pêroyî yê EUTCCyî û Unîversîteya Tennessee Teknoloji Michael Gunterî qiseykerdişê xo de bale ante rewşa peyên a Tirkîya ser.

Rojnameger Îrfan Aktanzî ard ziwan ke qismêko gird yê muxalefetê Tirkîya zî sey AKPyî heqanê kurdan red keno û vat, ''Ewropa herinda paştdayîşê kurdan de hemkarîya rejîmê Tirkîya kena.''

Hemsereka Pêroyî ya DBPyî Çigdeme Kiliçgun Uçar zî kirmanckî tewrbîyayoxî selam kerdî û vat, ''Bado ke dewlete 'prosesê çareserî' werte ra wedarit, dest pê çînkerdişê destkewteyan û erjanê kurdan kerd. Rixmê heme  zextan xoverdayîşê kurdan dewam keno.''