Komîsyonê Hemwelatîyan ê Yewîya Ewropa-Tirkîya (EUTCC) Parlamentoyê Ewropa de Konferansê Kurdan ê 18. organîze kerd. Konferans roja diyîne de saete 09. 00 de dest pêkerd.  Vizêr konferans de semedê azadîya Rayberê Şarê Kurdî Abdullah Ocalanî û wedartişê qedexeyê serê PKKyî ame vengdayene.

Roja diyînî de netîceyê Pêkerdişê Lozanî, tecrîdê Îmraliyî û rolê Abdullah Ocalanî, sîyasetê dinya û hêrişê vera Rojawanî ameyî destgirewtene.

Hemsereka PYDyî Asya Abdullah ard ziwan ke şer vera şaran yeno kerdene û vat, ''Şar bizorî cayê ci ra yeno raqilnayene. Bi polîtîkayanê qirkerdiş û barkerdişî yeno waştene ke demografîya herême bêro bedilnayene. Rewşa ke ewro qewimîyena zaf bitehluke ya û çend şino tehluke girdêr beno.''

Buroyê Huqûqî yê Asrinî ra Razîye Ozturk vat, ''Birêz Ocalan şertanê sinordaran de paradîgmaya ke heme şaranê Rojhelatê Mîyanênî rê nefes da girewene, aver berd. O çend semedê çareserî gurîyeno tecrîd hende yeno xorîkerdene. Hîrê serrî yo tira qet xeberêke nîna girewtene. Tepişteyê sîyasîyî vera tecrîdî grevê vêşanîye de yê.''

Endama Heyetê Rayberdişî yê EUTCCyî û KURD-AKADî ra Dersime Dagdevirenî bale ante tesîrê şertanê Îmraliyî yê serê weşîye ser û vat, ''Rixmê zîyaretanê CPTyî şertî nêameyî bedilnayene.'' Dagdevirene ard ziwan ke Tirkîya û Rojhelatê Mîyanênî de haştîye çîn a û vat, ''Semedê haştîye rolê Abdullah Ocalanî yo merkezî est o. Ganî berê Îmraliyî bêro akerdene û Abdullah Ocalan bibo azad.''

Merkezê Jineolojî yê Brukselî ra Elîfe Kaya zî bale ante hêrişê dewleta tirke yê vera têgêrayîşê azadîye yê cinîyan û heqanê cinîyan ser, cinîyê ke Parisî ra heta Silêmanî ameyî qetilkerdene vist vîrî û vat, ''Nê zextî nêeşkenê verê cinîyan bigêrê. Xoverdayîşê cinîyan do dewam bikero.''