Vervatoxê HDP'yî Gunay Kûbîlayî merkezê pêroyî yê partîya xo de kombîyayîşê çapemenîye kerd û derheqê babetanê rojdemî de qisey kerd.

Kûbîlayî bitaybetî bal ante qiseykerdişê Erdoganî yê Neteweyê Yewbîyayeyî ser  û vat: "Bitaybetî serranê peyênan de qiseykerdişê Erdoganî yê kombîyayîşê mîyanneteweyî  merdim şaxsîyetêko cîya yê sîyasî, karakterêko cîya yo sîyasî vîneno. Qiseykerdişê Erdoganî yo ke Neteweyê Yewbîyayeyî de kerdî eke tîya verba ey biameyêne kerdene, do bibîyêne semedê dewaye. Erdogan pakîya etnîkî ya sey Efrînî  wazeno"

Kûbîlayî qiseykerdişê Erdoganî yê derheqê Rojawanê Kurdistanî û Vakurê Rojakewtene de ard vîrî û vat: "Erdoganî ard ziwan ke wazeno bi mîlyonan multecîyan rê Tirkîya de ca bido. Seke yeno zanayene, Tirkîya zafê mendoxanê Kurdî yê koçberan ê Herêma Kurdistanî rê ber nêkerd a. La nika wazenê ke cayanê bînan ê Sûrîye ra koçberan berê herêmanê ke nufusê Kurdan tede zêde yo, tede ca bide. Çira? Seba ke wazeno pê xebitnayîşê multecîyan senî ke Efrîn de kerd, cayanê bînan de zî pakîya etnîke bike, Kurdan wareyanê înan ra dûrî bike û bi nê hewa domografî bi temamî bivurne. Bi planêkê winasînî wazeno hem Kurdanê Sûrîye ra hem zî multecîyanê Sûrîye ra bixeliso."