Welatanê cîya cîyayan ê Ewropa ra kurdî û dostê înan ê ke bajarê Den Haagî yê Hollanda de ameyî têhet Rêxistina Qedexekerdişê Çekanê Kîmyewîyan (OPCW) şermezar kerd. 

Rayraşîyayîş Meydanê Malieveldî de dest pê kerd û çalakwanî verê berê Parlementoyê Hollanda û Şaredarîye ravertî. Rayraşîyayîş de sloganê sey “NATO finanziert Turkei bombardiert”, “Terorist Erdogan”, “Zap Avaşîn Metîna Bijî Berxwedana Gerîla”, “Stop Die massamord in Kurdîstan”,“Jin Jîyan Azadî”, “Biji Serok Apo” ameyî eştene. Gama ke çalakwanî verê Konsolosxaneyê Tirkîya ra ravêrtî ciwananê ke waşt dewleta tirke şermezar bikerê raştê hêrişê  polîsanê Hollanda ameyî.

Hemserekê KONGRA-GELî  Remzi Kartalî ke çalakîye de qisey kerd, vera bêvnegîye hêrsê xo ard ziwan û vat: ''Hem çekanê kîmyewîyan şuxulnene hem zî kesê ke vanê şima qey nê çekanê qedexeyan şuxulnenê înan destbend kenê. Eke şima çekanê kîmyewîyan nêşuxulnenê, şima qey tepişnenê? Nizdê hîrê mengan o Xoşnav Ata semedê caardişê edaletî verê OPCWyî de çalakîye de yo û la waştişê ci nîno caardene. Şima nêeşkenê bêveng bimanê. Seba ke dewleta kurdan çîn a şima qirkerdişan qebul kenê? No wezîfeyê şima û ganî şima berpirsîyarîya xo bîyarê ca û semedê cipersayîşî heyetêk bişawê waranê gerîlayan.''

Komîteya Birîtanya ya vera çekanê kîmyewîyan ra rojnameger John Huntî zî vat ganî OPCW û heme dezgehê eleqedarî wezîfeyê xo bîyarî ca. Huntî vist vîrî ke heyetêk semedê cipersayîşî şi Başûrê Kurdîstan la PDKyî destûr ci nêda û vat dewleta tirke pîya bi çeteyanê xo hêrişê kurdan kena.

Xoşnav Atayo ke nizê hîrê mengan o verê OPCWyî de nobete tepişeno ard ziwan bi mengan o cewabê înan nêameyo dayene û vat ê qerardar ê do heta peynî çalakîya xo bidomnê.

Hemserekê KNKyî Ahmet Karamusî zî ard ziwan ke dewleta tirke pêkerdişanê mîyanneteweyîyî binpay kena û çekanê qedexeyan şuxulnena û vat dewleta tirke bêvengîya dinya ra paştî gena.

Bi nameyê PJAK, Îdareyê Xoserî yê Rojawanî û ADGByî qiseykerdişî ameyî kerdene. Qiseykerdişan bale ameye antene serê hêrişanê kîmyewîyan ê dewleta tirke yê vera gerîlayan ser û veng dîya OPCWyî ke wa cade wezîveyê xo bîyaro ca û heyetêk bişawo herême.