Serra 2023yî de 2 mîlyon û 505 hezar û 297 kesî Îranî ra sey multecîyan derbazê Tirkîya bîyî. Zafê înan zî pakîstanij û afganîstanijî bîyî. Tay afganî wextêkî ra pey sînorî ra ameyî teberkerdene. La leşkerê afganê ke Talîbanî ra remayê Tirkîya û endamê DAÎŞî yê afganî bi hawayêkê cîyayî ameyî pêşwazîkerdene.

Serra 2021î de dima ke Amerîka xo bi temamî Afganîstanî ra apey ant, Talîbanî newe ra îdare vist destî. Êyê ke zulmê Talîbanî ra remayê derbazê Tirkîya bîyî. Leşkerê afganî zî bi giranî derbazê Obekîstan û Tacîkîstanî bîyî.

Wezîrîya Karanê Teberî ya Ozbekîstanî bi eşkerayîyêke pare kerd ke 585 leşkerê afganî teyna di rojan uca de mendê û dima derbazê welatê hîrêyînî bîyê. Eşkerayîye de nameyê welatê hîrêyînî nêame eşkerakerdene. Naye ser o persa 'Gelo no welato hîrêyîn Tirkîya ya?' ameye vîran.

Goreyê agahîyan leşkerê afganî yê verênî û endamê DAÎŞî yê afganî (DAÎŞ-H) Tirkîya de destpêk de bi nameyê satajê zerrîwazî ameyî xebitnayene. 

Nê leşkerê afganê ke Talîbanî ra remayê Tirkîya û cergê DAÎŞ-Hyî kontrolê destpêkî ra dima erşawîyenê Erziromî û tîya ra zî Baregehê Serdar Mete Yildirimî de serê sînorê Rojawanî de yenê cakerdene. Nê kesî tîya de perwerdeyê leşkerî gênê û Rojawan de vera şerwananê kurdan tewrê şerî yenê kerdene. Dîya zanayene ke nê kesî mîyanê 'Artêşa Milî ya Sûrîye' de yenê cakerdene.