Partîya Çep a Keske ewro zî Licê, Çewlîg û Dêrsim de xebatê weçînayîşî kerdî. Qiseykerdişan de veng dîya ke seba azadîya Rayberê Şarê Kurdî Abdullah Ocalanî wa têkoşîn bêro kerdene.

Dêrsim

Namzeta Dêrsimî ya Partîya Çep a Keske Aytene Kordu, Wekîlê HDPyî yê Dêrsimî Alîcan Onlu û rêxistinanê Îtîfaqê Kede û Azadîye ewro qezaya Pulirî ya Dêrsimî de şarî reyde ameyî têhet. Heyetî verî esnafî zîyaret kerdî, dima zî buroyê xo yê weçînayîşî akerd.

Namzete Aytene Kordu akerdiş de qisey kerd û vat: ''Bawerîya ma ser o xeylêk meseleyî est ê. Ma sey elewîyan nêwazenê ke wa çew ma pênase bikero. Ganî pêro bawerî û nasnameyî hetê qanûnan ra bêro pawitene.''

Şarî akerdişê buroyê weçînayîşî ra dima heyetî reyde govende girewte.

Çewlîg

Namzetanê Çewlîgî Cemîle Turhalli Balsak, Omer Faruk Hulaku û Faruk Arisî ewro bînaya merkezî ya Partîya Çep a Keske de şarî reyde kombîyayîşêk kerd. Kombîyayîşî ra dima namzetî pê otonysa weçînayîşî heta buroyê Beşyolî şîyî û înan şar selam kerd. Sere de cinîyan şarî zaf eleqe mojna namzetan.

Namzete Cemîle Turhalli Balsak hesabê xo yê medyaya dîjîtale ser ra mesajê bi kirdkî weşanayî û vat: '' Ma ewro bînaya şaristanî ya partî de şarê xo reyde kombîyayîşêk viraşt û ma buroyê xo zîyaret kerdî. Şarê ma, ma reyde xeylê eleqedar bi. Bawerîya ma est a ke ma qezenc bikerê û na bawerîya ma zî hertim pîl bena û ma do pîya ser bikewê. ''

https://twitter.com/CemileTurhalli/status/1648626625892741122?cxt=HHwWhMCzuc7LjOEtAAAA

https://twitter.com/CemileTurhalli/status/1648729816949039104?cxt=HHwWgIC93Y_Cu-EtAAAA

Licê

Qezaya Licê ya Amedî de namzetê Amedî Berdan Ozturk, Cengîz Çandar, Sorgule Aytek û Wekîlê HDPyî yê Amedî Hişyar Ozsoy şarî reyde ameyî têhet. Konvoy hetê girseyan ra, bi slogananê “Bijî Serok Apo” û “Bê Serok jiyan nabe” ame pêşwazîkerdene. Qiseykerdişan de ame vatene ke Licê çimeyê xoverdayîş a û zerrîya Kurdîstanî ya. Qiseykerdişan de bale ameye antene tecrîdê Îmraliyî ser û veng dîya ke seba azadîya Rayberê Şarê Kurdî Abdullah Ocalanî wa têkoşîn bêro kerdene.

Qiseykerdişan ra dima pê tîlîlîyan buroyê weçînayîşî ame akerdene. Kombîyayîşê şarî pê govendan qedîya.