Netîceya xîretanê dewleta tirke de têgêrayîşê azadîye Başûr de yeno krîmînalîzekerdene. Şewatê Hewlêr û Kerkûkî ra dima PKK hetê hukmatê Iraqî ra ame dekerdene 'lîsteya rêxistinanê qedexekerdeyan.' Dima Konseya Muhakemekerdişî ya Berze ya Iraqî bi bahaneya ke 'têkilîya nînan bi PKKyî est a' bire daye ke PADÊ, Tevgera Azadî û Cepheyê Têkoşînê Demokratîkî bêrê qefilnayene.

Nê operasyonî hetê 'Odaya Operasyonê Hemparî' ra yenê caardene. Waştişê qefilnayîşê dezgehanê ke vera îşxal û îlhaqî veng vetêne, hetê endamê 'Odaya Operasyonê Hemparî' Şêwirmendê Asayîşê Neteweyî yê Iraqî Qasim Erecîyî ra ame kerdene.

Goreyê îdîayan Erecîyî hukmatê Erdoganî ra qasê 300 mîlyon dolar bertîl girewto ke waştişanê ci bîyaro ca. 

Erecî wextê hukmatê Haydar Ebadîyî de Wezîrê Karanê Zereyî bibi. Erecî 2003 û 2007 de hetê Amerîka ra tepişîyabi. O hem walîtîyanê Wasît û Basra de hem zî mîyanê hêzanê Haşdî Şabîyî de xebitîya.

Erecî wexto ke hetê Amerîka ra Quweyt de tepişîyayêne goreyê îdîayan hetê CIA ra erk dîya ci. Xora îşxalê Iraqî ra dima Erecî mîyanê rêxistina Bedîrî de seba caardişê polîtîkayanê Amerîka têgêra. Nika zî o bi destûrê Amerîka seba îşxalê Başûrê Kurdîstanî dewleta tirke de têkilîyanê xurtan virazeno. 

Heyetê bi serkêşîya Erecîyî 11ê temmuze de seba cigêrayîşê operasyonanê îşxalî şibi Hewlêr û Silêmanî. Erecî herinda ke şoro Hewlêrî sere de Mesrûr Barzanî xeylêk kesan de ronişt û dima zî waşt ke wa Peymana Şingalî ya 9ê Teşrîna Verêne cade bêra caardene. Naye ra 26 rojan ra dima zî bira qefilnayîşê PADÊ dîyaye.

Wina pawîyeno ke PADÊ, Tevgera Azadî û Partîya Cepheyê Têkoşînê Demokratîkî vera bira qefilnayîşî do muracatê Mehkemeya Temyîzî bikerê.

Hetê bînî ra îdarekaranê PDKyî ra Hoşyar Zebarî û Endamê Komîsyonê Pawitişî û Asayîşî yê Iraqî Segvan Sîndîyî ard ziwan ke ê bi bira qefilnayîşî kêfweş ê.