Rojnameger-nuştox Huseyîn Denîz 32 serrî verî amebi qetilkerdene. Denîz 9ê tebaxa 1992yî de qezaya Serêkanîyê ya Riha de amebi qetilkerdene. Denîzî bi serran qezaya Sêwregi ya Riha û qezaya Nisêbînî ya Mêrdînî de mamostatîye kerdbî.

Denîz wextê Darbeya Leşkerî ya 12ê Êlule de tepişîyabi, hîrê serran Zîndanê Amedî de mendbî. Ey 1991 de bi kurmanckî û zazakî kitabê 'Gotina Pêşiyên Kurdan' amade kerdbî û kitabê domanan ê bi nameyê 'Ji Nav Ajalan' weşanabi.

Kênaya Denîzî Zozane Denîz ard ziwan ke a bi hesreta babîyê xo bîya pîl û vat: ''Her serre çîyê ke gorê ey ser de yenê vatene ma sereberz kenê. Babîyê mi kitabê bi kurmanckî-zazakî nuştbi. Tedayê sîstemî ewro zî dewam kenê. La ê bi teda vizêr bi ma nêeşkayî û ewro zî nêeşkenê.''

Zozane da zanayene ke Musa Anter xalê babîyê ci bîyo û vat: ''Ey babîyê mi kerd pîl û kerd rojnameger. Xalê mi Musa babîyê mi ra 40 rojan pey ame qetilkerdene. Ma do serê rêçê nînan de şorê. Ez domananê xo rê qalê ziwan, kultur û cuye kena. O çax bi kiştişî înan kerdêne ke ma asteng bikerê. Ewro zî metodê înan astengkerdişê govend, ziwan, kincanê ma yê. La ê do bi ma nêeşkê.''