Serrgêra 4. ya xespkerdişê şaredarîyanê bajaranê pîlan ê Amed, Wan û Mêrdînî de verê rêxistina HDPyî ya Mêrdînî bi eşkerayîyêke qeyûmî ameyî protestokerdene.

Hemsereka Pêroyî ya DBPyî Salîha Aydenîz, Hemsereka Pêroyî ya Partîya Çep a Keske Çîgdeme Kiliçgun Uçar, Wekîlê Êlihî Mehmet Ruştu Tiryakî,  hemşaredarê ke herinda înan de qeyûm ame cakerdene û bi seyan kesî tewrê eşkerayîye bîyî.

Eşkerayîye de verê Mehmet Tiryakîyî qisey kerd. Tirkîyakî caakerdişê qeyûman sey darbe name kerd û vat qeyûman şaredarîyî açarnayî qereqolê polîsan.

Salîha Aydenîz zî wina qisey kerd: ''Ewro semedê Tirkîya rojêka tarî ya. Çunke dewleta tirke bi derbeya sîyasîye şaredarîyanê ma de qeyûm ca kerd. La şarê kurdî çirey îradeyê xo teslîm nêkerd û milê xo çewt nêkerd. Komara Tirkîya serê dişmenîya kudan de ameye ronayene û serrgêra 100. de bi eynî waştişî polîtîkaya xo domnena. Qeyûmê ke ameyê cakerdene ne hetê sîyasîyî, ne ehleqî û ne zî komelkî ra yenê qebulkerdene. Hedefê qeyûman o verên kurkî û destkewteyê cinîyan bê. Zîhnîyetê qeyûmî sîstemê hemserekîye sey dişmenê xo vîneno û wazeno werte ra wedaro. Sîstemê hemserekîye linga tewr muhîm a têkoşînê azadîye ya.Wazenê ke wa demokrasî werte bêro wedartene. Ma do nê çirey qebul mekerê. Ma do memûrê (qeyûm) ke nan şaredarîyanê ma de ca kerdî, peyser bişawê Anqara.''

Çîgdeme Kiliçgun Uçar zî nê vatî:  ''Îqtîdarê  AKPyî bi heme metodan keno ke pêro destkewteyanê kurdan çîn bikero. Sîyaset zanayîşo kolektîf o. Ma pîya bi şarê xo xebata şaredarî rayra berde. Qeyûmî bêrê cakerdene zî nê şaredarîyî hema ê cinîyan ê ke têkoşînê azaîdye yê şarê kurdî rayra benê.  Şarê ma polîtîkayanê qeyûmî zaf hole zano. Ma do vera zîhnîyetê faşîstî her warê komelî bixelisnê.  Ma çîyo ke yê ma yo peyser bîgêrê.''