'Ma Kolnî ra vengê xo biresnê Îmraliyî'
Kurdîstanijan semedê tewrbîyayîşê çalakîya merkezî ya Kolnî ya ke do 17ê sibate de semedê azadîya Rayberê Şarê Kurdî Abdullah Ocalanî bêro kerdene, veng da.
Bi wesîleya serrgêra Komployê 15ê Sibate yê vara Rayberê Şarê Kurdî Abdullah Ocalanî hetê KCDK-E û TJK-E ra 17ê sibate de bajarê Kolnî yê Almanya de çalakîya merkezî do bêro kerdene.
Paytextê Swîsre Bern de endamê komîsyonê hazirîya çalakîye yê ke Merkezê Komelê Demokratîkî yê Kurdan de ameyî têhet xebatî erjnayî û vat ê bi ruhê seferberîye xebatan rayra benê.
Hemşaredaro verên ê Êlihî Nejdet Atalayî vat ma do heta azadîya Rayberîya xo tim waran de bê.
Hemserekê Pêroyî yo verên ê DBPyî Mehmet Aslanî vat ma pêro pîya 17ê sibate de verê xo bidê Kolnî.
Wekîlo verên ê HDPyî Musa Farisogluyî vat ma do Kolnî ra vengê xo biresnê Îmraliyî.
Endamê TEV-ÇANDî Kawa Urmiyê zî vat ganî a roje her kes verê xo bido Kolnî.
Nejla Gumuştaş zî veng da cinîyan û şaranê azadwaştoxan ke wa tewrê çalakîya Kolnî bibê.
