Mayanê Şemeyî ra Saffete Yaman seba lajê xo Husamettîno ke 1992 de hetê dewlete ra amebi remnayene, têkoşîn kerdêne. Saffete Yaman 4ê kanûne de dinyaya xo bedilnabî.

Cenazaya aye bi merasîmêkî Adapazari de Goristanê Serdîvanî de ameye definkerdene.

Mayê Şemeyî, merdimê Saffete û xeylêk kesî tewrê merasîmî bîyî.

Mayanê Şemeyî seba Saffete Yaman medyaya dîjîtale de no mesaj da: ''Yewna maye verî ke biresa raştîyan şîye rehme. Ma do têkoşînê xo ra fek vera nêdê û bigêrê Husamettînî.''

Dima ke 2012 de leşkerê têgêrayîşanê taybetan ê artêşa tirke Ayhan Çarkinî tay îtîrafî kerdbî keyeyê Yamanî dozgerîye rê gerreyê sûcî kerdbi.