Mayê Şemeyî seba aqîbetê merdimanê xo pers bikê reya 757'ine Meydanê Galatasarayî de ameyî têhet. Rixmê astengîya polîsan merdimê vînîbîyayan vernîya şûbeyê ÎHD'yî yê Stenbolî de ameyî pêser, çalakîye de wekîlê HDP'yî Omer Ocalan, Oya Ersoye, Ahmet Şik û zafê temsîlkarê partîyan û dezgehê demokratîkî amade bîyî.

Qetilkarê Huseyînî Îdarekarê Leşkerî yê Demî yê Çewlîgî yê

Nê  hewte kêneya Fehmî Tosunî qisey kerd ke babîyê ci wexto ke amebi destbendkerdene ame vînîkerdene. Tosune aqîbetê Huseyîn Morsumbîlî pers kerd ke Çewlîg de verê 39 serran wexto ke wendekarê lîseyî bî tepiştişî de amebi vînîkerdene. Keyeyê ci o wextî ra gêreno ey. Tosune vat: "Babî Huseyin Morsumbulî rê îşkenceyêko giran ame kerdene. Fatma û Hanefî Morsumbul şîyê dozgerîya leşkerî û îfade da, gerayê sucdarî kerd la çîyêk nêame kerdene. Avûkatanê ÎHD'yî serra 2011 de eşkerayîya sucî ya newîye Serdozgerîya Komare ya Çewlîgî rê kerd, dima cigêrayîş dest pêkerd. La seba ke serebûtî ra pey zaf wext vîyarto derheqê dosya de qerarê 'hewcedarîya taqîbkerdişî çin a' ame girewtene. Keyeyî 2015 de îtîrazê ci kerd la hema zî çîyêk eşkera nêbîyo.  Mesuldarê vîndîkerdişê Huseyîn Morsumbulî Fermandarê Blokê Jandarma yê Merkezî yê Şaristan ê Çewlîgî Durmuş Coşkûn Kivrak, Fermandarê Alaya Şaristan ê Çewlîgî Beşîr Akin û pêro aktorê derbeya 12'ê Êlule yê.‘‘

Deweya Dayîke Fatma Do Bêro Domnayene

Badê eşkerayîye bi nameyê keyeyê Morsumbulî Ayten Morsumbulî qisey kerd. Morsumbule vat Dayîke Fatma ewro tîya nîya la ez tîya ya. Ez do dewaya cigerayîşê edeletî ya Dayîke Fatma bide domnayana. Herinda Aye de do ez esteyanê Huseyînî mile xo ser bikerişê. Ma edalet wazenê. Hînî wa nê dejê dayîkan biqedîo.'' Dayîka Huseyîn Morsumbulî, Fatma Morsumbula ke bi serran gêrayê lajê xo  û rixmê heme hêrişanê polîsan seba vînayîşê esteyanê lejê xo mucadele kerd, a zî  sey xeylî dayîkanê Şemeyî  mezelê lajê xo rê hesret çend serrî cuwa ver wefat kerd.