Mayanê  Şemeyî no hewte zî  semedê persayîşê aqibetê merdimanê xo yê ke bi destê dewlete ameyî vînîkerdene û muhakemekerdişê qetilkaran, waşt Meydanê Galatasarayî de eşkerayîye bidê.

Mayê Şemeyî  û pawitixê heqanê merdiman hewteyê 961. yê çalakîye de reyna hetê polîsan ra ameyî astengkerdene.

Hemsereka Pêroyî ya ÎHDyî Erene Keskin û îdarekarê komelê û xeylêk kesî tewrê çalakîya nê hewteyî bîyî. Mayê Şemeyî  û pawitixo heqanê merdiman gama ke ver bi Meydanê Galatasarayî şiyênî hetê polîsan ra gerîyayî binê ablûqa û ê bîlasebeb pê kelemçeyan ameyî destbendkerdene. Dîya zanayene ke hûmara kesanê ke ameyî destbendkerdene 20î ra zafêr a.