Seba ke sîstemê 'E-Reçetem'î de kurdkî çin a xeylêk kesan medyaya dîjîtale de nêrazîbîyayîşê xo mojna û waşt ke kurdkî zî tewra lîsteya sîstemî bêra kerdene.

Merkezê Pêroyî yê ÎHDyî hesabê xo yê medyaya dîjîtale de vat: ''Bi ziwanê dayîke xizmetgirewtiş heqê pêro hemwelatîyan o û mesuldarîya dewlete ya. Ma venga Wezîrîya Weşîye danê ke hûrmetê heqanê şarê kurdî bikera.''

Wekîlê Partîya Çep a Keske Alî Bozanî vat: ''Sîstemê E-Reçetemî rê 5 ziwanî ameyî îlawekerdene la mîyanê nînan de kurdkî çin a ke ziwanê bi mîlyonan kesan o.'' 

Sezaî Temellî: ''Çira kurdkî çin a? Ganî şima ziwanê şarê kurdî rê hûrmet bikerê û kurdkî zî tewrê lîste bikerê! Peynîya na dişmenîya xo bîyarê.''

Nahît Erenî: ''Hînî hîna zaf xizmetanê umûmîye de ca nêno dayene kurdkî. Wezîrîya Weşîye wa cade peynîya na cîyakerîye bîyara.''   

Merale Daniş Beştaş: "Selahîyetdarî cewab nêdanê persanê ma. Çira bi mîlyonan kurdî yenê mehrumkerdene?''