Seba ke qerarê wedaritişê destpanêdayîşê Hemseraka Partîya Herêmanê Demokratîkan (DBP) Salîha Aydenîz Komîsyonê Amadekarîye yê Meclîsî de amebi qebulkerdene çalakîyê protestokerdişî dewam kenê. Bajaranê cîya cîyayan ra şar wayîrê Aydenîze vejîyeno û aye sey îradeyê xo hesibneno.

 Rêxistina DBPyî ya Mêrdînî zî verê banê partîye de eşkerayîye daye. Wekîla HDPyî ya Mêrdînî Ebru Gunay zî tewrê çalakîye bîye.

Ebru Gunay bale ante Rayraşîyayîşê Gemîlîkî ser ke polîsan hêrişê şarî kerdbi û wekîlî kewtbî mabênê û vat: ''Îqtîdaro ke tim polîtîkaya tecrîd û şerî rayra beno wextê Rayraşîyayîşê Gemlîkî de zî na polîtîka rayra berde. Wedartişê destpanêdayîşê Aydenîze yeno manaya destûrdayîşê îşkenceyê polîsan o ke mabenê kuçeyan de kenê.  Salîha Aydenîz îradeyê cinîyan a, îradeyê Amedî, îradeyê kurdan û dostanê înan a. Çew nêeşkeno îradeyê ci rê destê xo derg bikero. Ma do tim paştî bidê embaza xo, kişta aye de vinderê.''