Vervatoxa Platformê Rojnamegeranê Cinîyan ê Mezopotamya (MKGP), Edîtora Jinnewsî û Endama PENa Kurde Roza Metîna derheqê operasyonanê destbendkerdiş û tepiştişî yê vera rojnamegeran de ANFyî rê qisey kerd.  

Roza Metîna eşkera kerd ke îqtîdarê AKP-MHPyî keno ke komel bi temamî kontrol bikero û vat: ''Îqtîdar keno ke şar xo nêresno raştîyan, coka hêrişê çapemenîya azade keno. Xora beşêko çapemenîye binê hukmê AKP-MHPyî de yo. Çapemenîya azade ra tewr peyêne embaza ma Dîcle Muftuoglu amebî tepiştene û a Amedî ra heta Anqara bi hawayêkê kelemçekerdeyî ameye berdene. Îqtîdar keno ke pê îşkence û teda rojnamegeran bitersno. La ma qetî sereyê xo nêard war û seba ke raştîyan biresnê şarî ma do têkoşînî rê tim dewam bikerê.''

Metîna vist vîrî ke 2022 de xeylêk rojnamegerî rojêke de tepişîyabî û vat: ''Îqtîdar nika zî vera rojnamegeran operasyonan keno Îqtîdar bi rayîrê nê operasyonan armanc keno ke mudaxeleyê weçînayîşanê 14ê gulane bikero. Rixmê teda û zorbazîye zî rojnamegerê cinî yê kurdî xo ver danê. Rojnamegerî karanê xo ra ameyê tepiştene û no bêhuqûqîyêka pîl a. Rojnamegerî vera na bêhuqûqîye her ca de xo ver danê. Ganî her kes paştî bido çapemenîya azade. ''