1ê teşrîna peyêna 2019î de vera wendekaranê kurdan ê Zanîngehê Akedenîzî Alî Butkul, Şerîf Saribulak û Ahmet Bîçerî hetê wendekaranê nîjadperestan ra hêrişêk amebi kerdene û wendekarê kurdî birîndar bibî. Hêrişî ra dima wendekaranê kurdan muracatê serdozgerîye kerdbi û gerreyê hêrişkeran kerdbi. Hêrişkeran zî gerreyê wendekaran ê kurdan kerdbi.

Gerreyê hêrişkeran ame qebulkerdene û mehkeme bire daye ke derheqê Butkulî û Saribulakî de bi îdîaya ''birîndarkerdişî û gefî'' dewa bêra akerdene. Wendekar Saribulakî zî dima gerreyê xo ra fek vera da.

Endamê Komîsyonê Huqûqî yê Şubeyê Antalya yê Komeleya Heqanê Merdiman (ÎHD) avûkat Ebedîn Altinkaynakî derheqê babete de qisey kerd û îfade kerd ke hêriş ser o cigêrîşêko bitesîr nêame kerdene. Altinkaynakî vist vîrî ke wendekaranê ke hedefê hêrişî bîyî asayîşî ra zanîngehî ca verda û vat: ''Mexdûrê nê hêrişî bîyî verguman. Ma do muracatê mehkeme bikerê ke kêmasîya dosyaya dewa bêra qedînayene û newe ra dewa bêra dîyene.''