Hemserekê Pêroyî yê HDPyî Mîthat Sancarî ANFyî rê Dewaya Kobanê ercnaye. 

Roniştişo verên ê Dewaya Kobanê  26ê nîsane de ame kerdene ke dewa de Selahattîn Demîrtaş û Fîgene Yuksekdag zî tede 108 sîyasetmedarî yenê muhakemekerdene. Dewa taloqê 18ê gulane ame kerdene.

Mîthat Sîncarî ard ziwan ke Dewaya Kobanê dafikêka sîyasî ya û vat: ''Na dewa dewayêka qesasî ya û safhayêka planê hîrayî yê tasfîye ya. Serebûtanê Kobanê ra 6 serran dima îdîanameyê Kobanê ame amadekerdene. 6-8ê teşrîna verêne ra dima Prosesê Çareserîye dewam kerd, Îmrali û Qendîl de pêvînayîşî ameyî kerdene. O çax vera partîya ma sûcdarîyêke nêameye kerdene. 28ê sibata 2015î de Mutabaqatê Dolmabahçe ame kerdene. Weçînayîşê 7ê hezîrana 2015î de nê sûcdarîyî ameyî rojdem.  Vera ma propagandaya reşe ameye kerdene. Dozgerî pê fermanê îqtîdarî têgêrayî.

Îqtîdar û tay dormeyî Kobanê de pê binkewtişê DAÎŞî qayîl nêbîyî û hêrs bîyî. Netîceya ney de polîtîkaya Sûrîye ya AKPyî rijîyaye. Coka AKP de, MHP de û hemparanê bînan ê îqtîdarî de hersêko pîl esto. Ê qesasê Kobanê gênê. Serkewtişê Kobanê kurdî Rojhelatê Mîyanênî de kerdî aktor.  Îqtîdar binkewtişê weçînayîşanê 7ê hezîrane, 31ê adare û 23ê hezîrane ra semed zî wazenp HDPyî ra qesasê xo bigêro. La embazanê ma rayraşîyayîşê xo rixmê teda dewam kerd. Planêkê tasfîye esto. Çarçewa nê planî de têna HDP nê yeno waştene ke pêro îradeyo sîyasî yê kurdan bêro şiknayene. Eke îqtîdar ser bikewo pêro hêzê demokrasî yê kurdan do tasfîye bikero. Îdîanameyê dewa pûç û çop o. Ma do na dewa de îqtîdarî muhakeme bikerê. Ma vera nê planê tasfîye amadekarîya xo kenê.

Îqtîdar wazeno verî HDP bêtesîr bikero, weçînayîşan ra teber bikero, dima zî polîtîkaya tenkîl û tedîpî ya ke 100 serrî yo vera kurdan yena caardene, bisino dewre. Yanî îqtîdar wazeno aktorîya kurdan a Rojhelatê Mîyanênî bixeripno, îradeyê kurdan bişikno. La no mumkîn nîyo çunke kurdî hînî zaf şîyar ê. 

Hêrişê îqtîdarî têna vera HDPyî nîyê. Îqtîdar wazeno rejîmêkê neweyî yê tirk-îslamgîrî rono. Xora hînî nê welatî de têna goreyê polîtîkayanê şerî tewirî yenê eşkerakerdene. Yanî ma têna xo, îradeyê xo, ameyoxê nê ê pêroyînan pawenê.Yê ke demokrasî wazenê, seba edaletî qerqilîyenê ganî vera nê polîtîkayan têbigêrê. HDP seba ke no îqtîdar şoro mesuldarîya xo do bîyaro ca.''

Mîthat Sancarî peynîya qiseykerdişê xo de qedexeyê tebervejîyayîşî yê 19 rojan û qedexeyê 1ê gulane ercnayî.

Sancarî vat: ''Îqtîdarî prosesê janî de seba berdewamîya îqtîdarê xo tedbîrî girewt. Rewşa şarî xemê înan de nîya. Îqtîdarî bêpaştdayîş, garantî qedexeyê tebervejîyayîşî îlan kerd. Rixmê bira qedexeyî ya îqtîdarî zî ma do 1ê Gulane karker û kedkaran reyde fîraz bikerê.''