Yew bajaranê Almanya yo ke Kurd û aktîvîstê Almanî tede yenê krîmînalîzekerdene Munîh o. Îdareyo rastgêr-muhafezekar ê Munîhî, heyranîya xo ya seba neteweperestanê Tirkan reyna ramote. Mudurê Asayîşê Munîhî Hubertus Andra vizêr Munîh de Otela Goethe de bi temsîlkaranê sazîyanê hetgêranê AKP-MHP’yî dir pêvînayîş kerd.

Verê pêvînayîşî, fotografê serekkomarê Tirkî Tayyîp Erdoganî û beyraqa Tirkan vernîya otele de ameyî daleqnayene. Serek û îdarekarê sazîyanê neteweperestan ê Tirkan ê Munîhî û yê Eyaletê Bavyera tewrê kombîyayîşî bîyî.

Kesê ke tewrê kombîyayîşî bîyî înan ra yew zî serekê Heyetê Koordînasyonê Komeleyanê Tirkan (TUDEK) Mahîr Zeytînoglû yo. Zeytînoglû kîşta mudurê asayîşî Andrayî de ronişt. TUDEK sazîyêk a ke paştî dana rejîmê AKP-MHP’yî. Goreyê hayîdarîyan, mudurê asayîşî Andrayî kombîyayîş de qalê hemkarîya polîsanê ke eslê înan Tirk o û Sefaretxaneyê Berzî yê Tirkî kerdo.

Paytextê Eyaletê Bavyera bajarê Munîhî sey cayêkê krîmînalîzekerdişê aktîvîstanê Kurdan yeno naskerdene ke bi mazerete beyraqê YPG/YPJ’yî û fotografê Rayberê Şarê Kurdî Abdullah Ocalanî xeylî aktîvîstanê Kurdan ser o zextî ameyê kerdene.