Mehkemeyê Asayîşê Dewlete (DGM) 1973 de ronîyayî, dima ameyî betalkerdene. La wextê Darbeya 12ê Êlula 1982yî de newe ra ronîyayî. DGM tewr peyên 2004 de ameyî betalkerdene.

Avûkat Ercan Kanaro ke wextêk DGM de amebi muhakemekerdene qala raştîya DGMyan kerde.

Kanarî da zanayene ke nê mehkemeyî sey berhemêkê darbe ronîyayê û vat: ''Mabênê serranê 1986 û 2002yî de 73 hezar û 936 dewayî ameyî dîyene, mabênê serranê 1990 û 2002yî de 294 hezar û 85 kesan ser o bire dîyaye û 82 hezar kesî ameyî mehkumkerdene. DGMyê Anqara de 4 wekîlê DEPî ameybî muhakemekerdene. Amed de 27 domanî seba ke perwerdeyê bi ziwanê dayîke wazenê DGM de ameyî muhakemekerdene û ceza dîyaye înan. Ez zî 1974 de DGMyê Adana de ameya muhakemekerdene.''

Ercanî ard ziwan ke DGMyan de bi îşkenceyî îtîrafî ameyêne girewtene û nînan de heqê pawitişî kêm bîyê. Ercanî vat: ''1980 de wexto ke mi dewayêke de pawitiş kerdêne, mehkeme pawitişê mi ra aciz bi û seba pawitişî teyna 10 deqayî dayî mi. Mi zî no protesto kerd û salone teriknaye. DGMyan de îtîrafê ke binê îşkenceyî de ameyê girewtene şuxilîyayêne. DGMyan de heqê îtîrazê biran û heqê redkerdişê heyetê mehkeme çin bîyî. DMyî vera xoserîya hêzan bîyî.''

Kanarî dîyar kerd ke DGMyan wextê rejîmê Mussolinî yê faşîstî ra îlham girewtbî û îfade kerd ke wextê AKPyî de mehkemeyî DGMyî ra zaf xirabêr ê. Kanarî vat: '' Hukmê wextê AKPyî ê DGMyî ra zaf xirabêr o. Nika seba cezadayîşî delîlê qîmî nêgêrîyenê. Eke şima muxalîf bê no seba cezadayîşî bes o.''