Endamê Înîsîyatîfê 'Abdullah Ocalanî rê Azadîye' yê Sûrîye Ferzende Munzurî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Munzurî vist vîrî ke Rayberê Şarê Kurdî Abdullah Ocalanî ra xeberêke nêna girewtene. Munzurî bale ante ser ke Abdullah Ocalanî pê fikranê xo perspektîfê çareserîye pêşkêş keno û hukmatê Erdoganî pê tecrîdî wazeno ney asteng bikero. Munzurî îfade kerd ke heta ke meseleya kurdan çareser nêba aramîye nêna û seba ney zî Ocalan Rojhelatê Mîyanênî de wayîrê rolêkê dîyarkerî yo.

Ferzende Munzurî ard ziwan ke Komîteya Vergirewtişê Îşkenceyî ya Konseya Ewropa (CPT) û Mehkemeya Heqanê Merdiman a Ewropa (MHME) erk û mesuldarîyanê xo nêanê ca û vat: ''Derheqê Îmraliyî de fikr û pêşnîyazî est bîyî. CPTyî tewirê 'Mi Îmrali zîyaret kerd, hînî Tirkîya zanena' mojna. CPT bi canêardişê wezîfe û mesuldarîyanê xo, hêzî dano dewleta tirke ke polîtîkaya xo ya înkarî rê dewam bikera. CPT paştî dano dewleta tirke. Ganî CPT nê tewir û nêzdîbîyayîşê xo newe ra biercno û xizmetê zaliman nêkero.''

Munzurî dîyar kerd ke seba ke tecrîdî biqedo û azadîya Rayberê Şarê Kurdî bêra caardene înan zaf reyî dezgehanê sey CPTyî rê waştişnameyî şawitê. Munzurî vat: ''Dezgehê ke qaşo babeta meseleya kurdan û derheqê Rayber Apoyî de edaletî bîyarê ca, zaf erey têgêrenê. Waştiş û pêşnîyazî çin hesibîyenê. Tarîx nê kerdişan zî efû nêkero. Sey înîsîyatîfî erkê ma yo bingeyî yo ke vengê Rayber Apoyî biresnê şaran, seba caardişê azadîya Rayber Apoyî têbigêrê. Na çarçewe de amadekarîy yenê kerdene ke Rojhelatê Mîyanênî de derheqê fikr û felsefeya Rayber Apoyî de konferansêk do bêro kerdene.''