Avûkatanê Rayberê Şarê Kurdî Abdullah Ocalanî û ê tepişteyanê bînan ê Îmraliyî Faîk Ozgur Erol, Cengîz Yureklî, Mazlum Dînç û Newroze Uysal û keyeyanê tepişteyan muracatê Serdozgerîya Komare ya Bursa kerd ke mabênê tarîxanê 6-10ê nîsane de mîyanê şert û mercanê musbetan de pê telefonî û rî bi rî pêvînayîş bikerê

Ame waştene ke eke bêro kerdene cayê pêvînayîşî vera vîrusê Korona bitebdîr bibo. 7ê tabaxa 2019î ra nata muracatanê avûkatan rê cewab nêno dayene.

Keyeyanê tepişteyan ê bînan ê Îmraliyî ra birayê Omer Hayrî Konarî Alî Konarî, birayê Hamîlî Yildirimî Plat Yildirim û waya Veysî Aktaşî Melîhe Çetîn zî bi rayîrê avûkatanê xo seba pêvînayîşî muracat kerd. Ame waştene ke eke pêvînayîşo rî bi rî nêro caardene bi rayîrê telefonî pêvînayîşêk bêro kerdene.