Îtîfaqê Kede û Azadîye seba protestokerdişê qetilkerdişê muzîsyen Cîhan Aymazî Îskeleya Kadikoyî de eşkerayîyêke daye çapemenîye. Merdimê Cîhan Aymazî zî tewrê eşkerayîye bîyî. Eşkerayîye de pankarta ''Ma kiştoxanê Cîhanî ra hesab bipersê'' ameye akerdene û sloganê sey ''Vera faşîzmî mil bi milî'' ameyî vatene.

Hemserekê Partîya Çep a Keske yê Kadikoyî Koray Turkanî eşkerayîye de pare kerd ke Cîhan Aymaz hetê hişmendîya tekpereste ra qetil bîyo û vat: ''Cîhan muzîsyenê kuçeyan bi. Kadikoy de her kesî o şinasnayêne. Cîhanî sereyê xo nêard war, ma zî do nêarê. Ma do hişmendîya tekpereste û faşîste bin bivisnê û hesabê qirkerdişan bipersê.''

Ozleme Ozdemîr nameyê Îtîfaqê Kede û Azadîye ser o eşkerayîye wende û vat: ''Kesê bi nameyê Mehmet Caymazî Cîhanî ra waşt ke wa deyîra 'Olurum Turkiyem' vajo. Seba ke Cîhanî no red kerd ame qetilkerdene. Ma na barbarîye şermezar kenê.''

Deza û xalê Cîhan Aymazî Mehmet Gunhan û Îbrahîm Rifatogluyî zî eşkerayîye de qisey kerd û vat: ''Cîhan nasnameyê xo û deyîra kurdkî ra semed hetê hêzanê paramîlîteran ra ame qetilkerdene.''

Qiseykerdişan ra dima girseyî cayê qetilkerdişî de qeranfîlî nayî ro.