Xarpêt de 450 hezar weçînitoxî est ê. Xarpêto ke hedefê polîtîkayanê asîmîlasyonî yê dewleta tirke de yo, hêvî keno ke 14ê gulane de do newe ra abigêr kultur, tarîx û azadîya xo.

Namzeta Xarpête ya Partîya Çep a Keske Sultane Yaray ANFyî rê qisey kerd û pare kerd ke ke ê do babetanê kurdkî, tepişteyan, cinîyan û ekolojî de xebatanê netîcegîran bikerê.

Yaraye da zanayene ke a do vera binpaykerdişê heqanê tepişteyan û tecrîdî bi xurtî têkoşîn bikera. Yaraye vat: ''Meclîs de û mîyanê komelî de ez do bi hawayêkê aktîfî vera hişmendîya serdestîya camêrdan, pederşahîye seba heqanê cinîyan û qanûnanê cinîyan bixebita. Ez do bikera ke cinîyî biresê nasnameyê xo yê azadî, têdûştî û raştikênî. Vera îstîsmarê domanan, xebitnayîşê domanan û seba heqanê domanan û seba heqê perwerdeyê bi ziwanê dayîke zî ez do xebatan bikera. Ez do vera talan û herimnayîşê xoza, vera kedwerdişî bixebita. Seba heqanê heywanan zî ez do bi şîarê 'xozayêka keske, dinyayêka hûyaye' bixebita. Seba ke welatêkê azadî de her kes bi ziwan, bawerî û kulturê xo biciwîyo ez do şarî û dezgehan reyde projeyanê kolektîfan viraza.''

Sultan Yaraya ke Mêrdînî ra ya, dadîya 4 domanan a. A hem nuştox hem zî şaîrêka kurmanc a. Yaraye heman wextî de îdarekerêka PEN-Kurdî ya û ronayoxanê Komeleya Edebîyatkaranê Kurdan ra yew a. Yaraye heman wextî de hema zî endamêka aktîf a Platformê Yewîya Cinîyan ê Kurdan a.