Êlih de karê weçînayîşan dewam kenê. Partîya Çep a Keske kena ke Êlih de panc wekîlîyan bigêrê. Namzetê Êlihî yê partîye Keskîn Bayindir, Ekrem Baran, Nurtene Ertugrul û Zeynepe Oduncu yê. Înan derheqê armancanê xo de ANFyî rê qisey kerd.

Bayindiro ke Êlihî ra yo rêzê verênî de cagêno. Bayindirî ard ziwan ke Êlihî destpêkî ra nata bedelê giranî dayê û vat: ''Êlih hem prosesê weçînayîşan de hem zî hetê awankerdişê ameyoxî de wayîrê cayêkê girîngî yo. Coka ma akerdişê buroyê xo de soz da şarê xo ke Êlih de 5 de 5 bikerê. Ma vînenê ke şarê Êlihî na babete de zaf qerardar o. Binê meseleyanê Êlihî de polîtîkayê înkarî yê îqtîdarî est ê.''

Namzeta rêzê diyînî, Hemşaredara verêne ya Kercewsî Zeynepe Oduncu vat: ''Şaristan de meseleya tewr pîle meseleyê cinîyan ê. Verê cinîyan de têkoşînêko zehmet est o. Wexto ke qeyûm erşawîya serê şaredarîya ma mufetîşan tim ma vistî binê 'kontrolî.' Nê qeyûmî vera îradeyê cinîyan ameyî tayînkerdene. Înan hêrişê ziwan û kulturê kurdan zî kerd. Coka sey Partîya Çep a Keske ma do vera nê hêrişan têkoşîn bikerê. Ma prosesê weçînayîşî de vînenê ke ganî têkoşînê xo pîlêr bikerê.''

Namzeta rêzê çarinî Nurtene Ertugrula ke Çewlîgî ra ya vat: ''Êlih de meseleyê cinîyan ganî cade bêrê çareserkerdene. Ganî vera qirkerdişê cinîyan tîya de karê girîngî bêrê kerdene, têkoşîn bêro dayene. 21 serranê îqtîdarê AKPyî de Êlih de 7 hezar û 500 cinîyî ameyî qetilkerdene. Ganî cinîyî nê îqtîdarî bişawê. Seba azadîye, asayîş û ameyoxê domanan ganî îqtîdar bêro şawitene.''

Namzetê rêzê pancinî û alîmê dînî Ekrem Baranî vat: ''Ma kenê ke êlih de îradeyê şarî ser bivisnê. Êlih de şarî ma bi coşî pêşwazî kerdî. Nê peşwazîkerdişî de mi ruhê serranê 90an dî. Şarê Êlihî têkoşînê azadîye de zaf bedelî dayî. Coka wayîrê îradeyê xo vejîyeno. Şarê kurdî qetî vera hêrişan sereyê xo nêard war û nika ra pey zî do nîyaro.''