Vîrusê Covid-19î roje bi roje Swedî ser o tesîrêko giran keno. Tewr zêdêr zî karkerî, kedkarî û koçberî tesîrê janê vîrusê Korona de yê. Taxanê şaristanan ê pîlan de  hûmara kurdan, asûr-sûryanan û elewîyanê ke pandemî ra binê karantîna de yê tay nîya. Zafê înan keyeyan de binê karantîna de yê û qedexe yo ke bivejîyê teberî.

Dima ke vîrusê Korona roje bi roje vila bi, Merkezê Komelê Demokratîkî yê Kurdî (NCDK) yê Swedî seba paştdayîşê koçberanê Kurdîstanî û Tirkîya şaristanan de masayê krîzî awan kerdî. Pê rayîrê telefonî hewcedarî eşkenê xo biresnê nê masayanê krîzî. Heta nika paytext Stockholm, şaristananê Goteborg, Malmo, Vasteras, Borlange, Gavle, Helsinborg, Uppsala de masayê krîzî awan bîyî.

Hemserekê NCDKyê Swêdî Ridvan Altunî derheqê babete de ANFyî reyde qisey kerd û îfade kerd ke nê wextan de ganî paştdayîş û hetkarîya koçberan û swêdijan bêrê xurtkerdene. Altunî vat: ''Masayê krîzî têna seba kurdîstanijan û tirkîyayîjan nê, seba swêdijan zî karê paştdayîşî kenê.''

NCDKyî karê xo yê masayanê krîzî îdareyanê şaredarîyan reyde pare kerd.