Meclîsê Partîya Demokrasîyî û Têdûştîye yê Şaran (DEM Partî) 15-16ê kanûne de kombîyayîşê Meclîsê Partîye (PM) kerdbi.

DEM Partî netîcenameyê kombîyayîşê xo de vat: ''Ma hîna zaf qerardar bîyê ke bi namzedanê xo debikewê weçînayîşan.'' DEM Partî da zanayene ke seba weçînayîşanê herêmîyan erk dayo MYK û hemserekanê pêroyîyan.

Netîcename de xeylêk birê ke kombîyayîş de ameyê girewtene, cagênê.

DEM Partî netîcenameyê xo de bale ante tecrîdê vera Rayberê Şarê Kurdî Abdullah Ocalanî ser û vat: ''Her ke tecrîd beno giranêr meseleyê Tirkîya zî benê xorinêr. Tecrîdê vera Birêz Abdullah Ocalanî reyde înkarê kurdan zî dewam keno. Tecrîdo mutleq yew îdareyê sîstemî û alûqaya îdeolojîke-polîtîk a. Na ablûqa çaresernêkerdişê meseleya kurdan xorin kena. Sey DEM-Partî heta ke tecrîd bêro wedaritene ma do têkoşîn bikerê.''

Netîcenameyê DEM-Partî de nê birî cagênê:

''-Netîceyê weçînayîşanê herêmîyan ê 2024î do Kurdîstan û Tirkîya de tesîranê sîyasîyan ê cidîyan vejê werte. Sey partîya dîyarkere hayîya ma bi mesuldarîyanê ma est a.

-Meseleyî ganî bi rayîrê muzakere bêrê çareserkerdene. Coka ma qîmet danê ci ke partîyî yewbînan de muzakere û dîyalogan bikerê.

-Bi tewir û ziwanê xo yê sîyasîyî ma sey xeta statubaze û xeta restorasyonbaze nîyê. Xeta ma Xeta Hîrêyîne ya. DEM Partî xo sey partîya muzakere û têkoşînî vînena. Xeta Hîrêyîne xeta çareserîya meseleya kurdan, vera rejîmê qeyûman wayîrvejîyayîşê îradeyê xo û xeta azadîye ya.

-Ma do bi stratejîya xo weçînayîşanê herêmîyan de bi îradeyê şarê xo ancî şaredarîyanê xo bigêrê û qeyûman bişawê. Ma do meclîsanê şaredarîyan de zî ser bikewê. Seba nê hedefanê xo ma do bi nameyê partîya xo xebatanê hemkarîye bikerê.

-Rojawanê Tirkîya de zî ma do pêro dînamîkanê komelî de, rêxistinanê bawerî, ekolojî, cinîyan û karkeran de, partîyanê sîyasîyan ûsn de pêvînayîşan û muzakereyan bikerê û bi zemînê Pêkerdişê Şaristanî awan bikerê.

-Sey Mutefîqanê Kede û Azadîye ma do ferasetê hempar-kolektîfî pîl bikerê.

-Kombîyayîşê Meclîsê Partîye de ma hîna zaf qerardar bîyê ke weçînayîşanê herêmîyan de namzetanê xo bimojnê.

-Wa çew şik nêkero ke ma do destûr nêdo ke xebata ke şarê ma rê fayde nêkena do bêra kerdene. Eqsê ci ma do bi biranê xo û xebatanê xo yê stratejîkan bi şaranê Tirkîya bidê qezençkerdene.

 -Kombîyayîşê PMyî de bire dîyaye ke weçînayîşanê herêmîyan de erkî bêrê dayene Heyetê Rayberdişî yê Merkezî û Hemserekanê Pêroyîyan.

-Îradeyê Meclîsê Partîye weçînayîşanê herêmîyan de ma rê do serfîrazîyêka pîle bîyaro. Ma bi nê hîsan û fikran pêro şaran selam kenê.''