Nobeta Azadîye ya ke 25ê hezîrana 2012î ra nata bajarê Strasbourgî yê Fransa de, semedê azadîya Rayberê Şarê Kurdî Abdullah Ocalanî yena kerdene, hewteyê 603. de  hetê koma newî ameye dewrgirewtene.

No hewte hîrê welatperwerê ke bajarê Marsilya yê Fransa ra ameyî, nobete dewr girewte. Koma Marsilya de Nîhat Îldan, Dîyadîn Gulen û Taner Karakaya ca genê.

Nîhat Îldanî ke bi nameyê koma qisey kerd, veng da Konseya Ewro û Parlementoyê Ewropa ke wa berpirsîyarîya xo bîyarî ca û vera tecrîdê Îmraliyî têbigêrê. Îldanî vist vîrî ke hrî serrî yo Rayberê Şarê Kurdî Abdullah Ocalanî ra xebere nîna girewtene û vat ganî CPT newera şiro Îmrali, pêvînayîş bikero û netîceya pêvînayîşî pare bikero.

Eşkerayîye de grevê vêşanîye yê tepişteyan û nobetê edaletî yê Dayîkanê Haştîye  yê ke vera tecrîdê serê Abdullah Ocalanî yenê kerdene ameyî selamkerdene  û ame vatene ke ganî şarê kurdî xoverdayoxanê zîndanî û Dayîkanê Haştîye têna meverdo.

Îldanî veng da şarê kurdî yê Ewropa de wa tewrê çalakîyanê  vera tecrîdî bibo  û berpirsîyarîya xo bîyaro ca.