Seba protestokerdişê destsernayîşê şaredarîyanê Amed, Wan û Mêrdînî Meydanê Esenyurtî yê Stenbolî de Nobeta Demokrasîyî ameye viraştene. Parlamenterê HDP'yî Zuleyha Gulume, Kemal Bulbul, Omer Ocalan, Sarûhan Olûç, Necdet Îpekyuz, parlamenterê CHP'yî Alî Şeker zî tede temsîlkarê dezgehan tewrê Nobeta Demokrasîyî bîyî.

Polîsan meydanê nobete girewt û nêverda ke parlamenterî bikewê meydan. Polîsan dima bi fîşêkanê plastîkan hêrişê parlamenteran kerd. Hêriş de verçimikê parlamenterê HDP'yî Kemal Bulbulî ame şiknayene û Bulbul ame berdene bi  nêweşxaney. Çalakîya nobete de polîsan xeylî kesî zî destbend kerdî.Parlamenteranê HDP’yî vera hêrişê polîsan nêrazîbîyayîşê ramojna û vat qet kes nêeşkeno bi hêrişan vernîya mucadeleyê demokrasî û haştîye bîgêro. Polîsan destûr nêda şar bikewo meydan û hêrişê înan kerd û xeylî kesî destbend kerdî. Rayna xeylî kesî rîyê fîşêkanê plastîkan ra birîndar bîyî. La kîtleyî rixmê hêrişan bi sloganan qeyûm şermezar kerd û mesajê xoverdayîşî dayî.