Wekîlê HDPyî roja 14. de vera tecrîdkerdişê Rayberê Şarê Kurdî Abdullah Ocalanî Nobeta Edaletî rê dewam kenê. Wekîlî Remziye Tosûn, Mehmet Ruştu Tîryakî, Mahmut Celadet Gaydali, Erol Katircioglu, Erdal Aydemîr, Kemal Bulbul, Kemal Pekoz, Huseyîn Kaçmaz, Muazzeze Orhan Işik û Nurane Îmîr tewrê çalakîye bîyî.

Wekîla HDPyî Nurane Îmîr nameyê wekîlan ser o qisey kerd û ard ziwan ke îqtîdarê AKP-MHPyî bi rayîrê tecrîdê Îmraliyî welat binê tarîtîye de verdeno. Îmîre vat: ''Girawa Îmraliyî de huqûqêko taybet yeno caardene. 14 rojî yo ma nobete de yê la rixmê ney zî îqtîdarî ra vengêk nêvejîyeno. Îqtîdar bi bahaneyan  nêverdeno Birêz Ocalan keye û avûkatanê xo bivîno. Tecrîdê Îmraliyî parçeyêkê şerê taybetî yo.

Ganî îqtîdar dişmenîya kurdan ra fek vera bido. 2 serrî yo rixmê 300 muracatan zî avûkatî nêeşkenê Birêz Ocalanî bivînê. Ganî îqtîdar berê Îmraliyî abikero û heyetê xoserî, avûkatî û heyetê ma şorê Îmraliyî. Bi qedexeyan û polîtîkayanê gemarinan welatêk nêno îdarekerdene. Ma tîya de rolê xo anê ca. Seba ke tecrîdî bişiknê ma do her çî bikerê. Ma venga Wezîrîya Edaletî danê ke cade heyetêkê xoserî bişawa Îmraliyî û berê Îmraliyî seba haştîye û çareserîye abikera.''