Mehkemaya Oslo seba ke dewleta Norveçî  bextwaştoxa sîyasîye Gulîzar Taşdemîre îadeyê Tirkîya kerde, qerar da ke înan heqê merdiman binpay kerdo.

Dewleta Norveçî serra 2015 de muracatê bextwaştişî yê aktîvîsta cinîye Gulîzar Taşdemîre qebûl nêkerd û a par 4’ê Temmuze de a îadeyê Tirkîya kerdbî. Taşdemîrê Tirkîya de ameyî destbendkerdene û dimayê îşkence ra ravêrtişî ameyî tepiştene. Îadeyê Taşdemîrî Norveç de hetê partîyanê sîyasîyan û rêxistinanê cinîyan ra bi reaksîyon amebi pêşwazîkerdene. Avûkatê Taşdemîrê Jan Birkelandî derheqê dewleta Norveçî de dawa akerde. Roniştişê dewa yo ke roja Îneyî ame viraştene de mehkemayê Oslo qerar da ke dewleta Norveçî bi îadekerdişê Taşdemîre heqê merdiman binpay kerdo. Buroyê Koçberan ê Norveçî zî şawitişê Taşdemîrî sey xeta qebûl kerdbi û emser 24’ê Temmuze de muracatê ci yê bextwaştişî qebûl kerdbi.