Têkoşînê vera vîrusê Korona (Covid-19) dewam keno. Pandemîya ke heta nika 170 herêman û welatan de bila bîye, pêro dinya de bîye semedê mergê 16 hezar kesan. Tirkîya de hûmara qurbanan bena zêdêr. Pê vilabîyayîşê vîrusî qesawet zîndanan de zî beno zêdêr ke rejîmê AKPyî zîndanî îşxal kerdî.

Hetkarê Hemserekanê Pêroyîyan ê HDPyî Umît Dedeyî pare kerd ke hewteyê vîyarteyî de derheqê na mesele de ey selahîyetdaranê hukmatî reyde pêvînayîş kerd, waşt ke zîndanî bêrê vengkerdene la hukmatî heta nika gamêke nêeşte. Sere de partîyê sîyasîyî, rêxistinê komelkîyî yê sivîlî, hêzê demokratîkî bi eşkerayîyan û kampanyayan medyaya komelkî de veng danê ke ganî seba na mesele gamêke bêra eştene.

Bedlîs, Colemêrg û Wan de ke zaf zîndanî estê tehlukeyê weşîye yê zîndanan esto.

Serekê Odaya Tabîban a Wan-Colêmergî Ozgur Degerî ard ziwan ke vîrusê Korona lez vila beno. Degerî bale ante ser ke tepişteyêko nêweş eşkeno vîrus pêro zîndan de vila bikero û vat: ''Merdimê ke sîstemê pwitişî yê leşê înan qels ê û înan de nêweşîya qelbî û tansîyonî esta rewşêka bitehluke de yê ke bimirê. Bi taybetî merdimê ke nê kategorîyî de yê ganî bêrê veradayene. Hukmat vano ke têna tepişteyê edlîyî yê winasênî bêrê veradayene la ganî tepişteyê sîyasîyî zî bêrê veradayene.''

Serekê Odaya Tabîban a Bedlîsî Osman Fatîh Şanliyî zî reyna venga şarî da ke keyeyî ra mevejîyo. Şanliyî eşkera kerd ke eke zîndanan de tebdîr nêro girewtene rewşêka dramatîke vejîyena werte û vat: ''Warê ke girewte yê merdiman rê gefêko pîl waneno. Weşîya merdiman her çî ra girîngêr a û ma venga hukmatî danê le zîndanan veng bikero.''