Komeleya Huqûqnasan a Seba Azadîye (OHD) vera tecrîdê serê Rayberê Şarê Kurdî Abdullah Ocalanî û Omer Hayrî Konar, Hamili Yildirim û Veysî Aktaşî yê ke Îmrali de yenê tepiştene, xeylêk bajaran de çalakîyê hemwextî kerdî û nêrazîbîyayîş mojna.

Şubeyanê OHDyî de eşkerayîya hempare ameye dayene û nê ameyî vatene: "30 aşmanî ra zafêr o ke Rayberê Şarê Kurdî Abdullah Ocalan û hîrê tepitşeyanê bînan ra xebere nînan girewtene. 7ê tebaxa 2019î ra nata rixmê heme muracatan avûkatêk hema nêeşkayo şiro Îmrali. Muwekîlê ma nêeşkenê heqê xo yê mektûb û telefonî zî bişuxulnê. Muwekîlê ma seba ke kurd ê û rîyê nasnameyanê xo yê polîtîkan ra wina yenê cezakerdene. Rayaperoyîya ya Tirkîya de vera nê tecrîdî veng nêvejîyeno û rewşe nêvînayîşî ra yena.

CPTyî raporanê xo de bêhuqûqîye tespît kerd û  Tirkîya hîşyar kerd la Tirkîya herinda caardişê nê pêşnîyazan de tecrîd dahîna xorî kerd. Reyna qerarê tedbîrî yê Komîteya Heqanê Merdiman a Neteweyanê Yewbîyayan zî nêardî ca. Hetê bînî  ra 2022 de 26 baroyan ra 775 avûkatan semedê pêvînayîşî muracat kerd la cewabê nînan nêame dayene. Sere de welatanê Ewropa ra 22 welatan ra 350 avûkatan û  Rojhelatê Mîyanênî ra 756 avûkatan muravat kerd ke wa avûkatî bieşkê pêvînayîşê Îmraliyî bikerê.Cewabê  nê muracatan nêame dayene. 

No zî mojneno ke Îmrali de huqûq werte ra ameyo wedartene. Îmrali de qanûn nê qerarê polîtîkî yenê caardene.Yeno waştene ke Birêz Ocalan û hîrê tepişteyê bînî Îmrali de bêrê vînîkerdene, vîrakerdene. La ma zaf hole zanê ke ê se kenê wa bikerî do meeşkê verê Birêz Ocalanî bîgêrê.  Dewlete wextanê cîya cîyayan de Ocalanî reyde pêvînayîşî kerdî, masa de ronişte û dîyalogî aver berdî. Bi vengdayîşê Birêz Ocalanî prosesê adirbirnayîş ameyî ciwîyayene, grûbê haştîye ameyî Tirkîya. Ewro tecrîd Tirkîya ra vila bîyo he welat de her hetî ra krîz est ê û şar tengayî anceno. 

Ma sey huqûqnasan veng fanê CPT û dezgehanê eleqedaran ê Ewrpa ke wa şirê Tirkîya ser ke no tecrîd bêro wedaritene. Ma veng danê ke sere de baroyî û rêxistinê huqûqî û heme huqûqnasî, rayapêroyîya demokratîke wa vera tecrîdê Îmraliyî vengê xo vejê."