Turgut Okero ke bi serra Serekîya Merkezê Kulturî yê Elewîyan ê Hamburgî, Sekreterîya Federasyonê Yewîyanê Elewîyan ê Almanya (AABF), Sekreterîya Pêroyî ya AABFyî û Serekîya Konfederasyonê Yewîyanê Elewîyan ê Ewropa (AABK) kerdbî, Partîya Çep a Keske ra, herêma 1. ya Îstanbulî ra, namzetê wekilîye yo. Okerî ANFyî rê qisey kerd û weçînayîşan ra waştişê elewîyan rêz kerdî.

Turgut Okerî vat: ''Eke ma Partîya Çep a Keske sey dewamê HDPyî bivînê, hînî na partîye ra beer Tirkîya de partîyêka bîne çin a ke warêkê taybetî dana elewîyan. Partîyêka diyîn a winayêne çin a ke seba elewîyan bernameyê xo yo taybet est o, waştişanê elewîyan ana ziwan.''

Okerî îfade kerd ke Partîya Çep a Keske teyna seba elewîyan nê seba pêro ê bînan welat de bîya hêvî û vat: ''Ez 35 serran Ewropa de menda, hetê bernameyê partîyan ra tewr zag hetê hemparîya demokratîke ra Partîya Çep a Keske zaf aver a. Coka mi Ewropa de zî na partî tercîh kerde. Mabênê ma de qet yew cîyatîye çin a. Nêzdîbîyayîşê 'Çira şima cîyatîya xo vejenê vernî?' mîyanê Partîya Çep a Keske de çin o. Waştişê bingeyî yê elewîyan mîyanê bernameyê na partîye de est ê û reya verên a ke elewîyan mîyanê partîyêke de masa naya ro, seba çareserîyanê meseleyanê xo karêkê xoserî kerdê. Coka sey merdimêko ke bi serran serekîya dezgehanê elewîyan kerda, mi verê xo da na partîye.''

Okerî ard ziwan ke mîyanê partîyanê Meclîsî de partîyêka bîne çin a ke wayîra kontenjanê elewîyan bena.

Turgut Okerî vist vîrî ke HDPyî û Konfederasyonê Yewîya Elewîyan ê Ewropa serra 2015î de hemkarîyêka stratejîke kerda û vat: ''2015 de mi sey serekê konfederasyonî 300 cemxaneyanê Ewropa û serekanê merkezanê xo yê kulturî yê elewîyan reyde Demîrtaş zîyaret kerd û ma pêşnîyazê hemkarîya stratejîke kerd. Netîce de se ra 98ê beşdarê ma hetê HDPyî de vindertî. Hemkarîya ma teyna seba elewîtîye yan zî seba weçînayîşan nêbîye. Ma HDPyî yanî bernameyê Partîya Çep a Keske ewro zî sey bernameyê xo vînenê. Na hemkarîye bingeyê azadîye, hemwelatîyêka têdûşte û azadîya bawerîyan ser o ronîyaya. Partîya Çep a Keske heman wextî de partîya elewîyan a. Ez venga pêro hêzanê demokratîkan û şaranê bindestan dana ke raya xo bidê Partîya Çep a Keske.''