Serekwekîlê Grûba HDPyî Saruhan Oluçî derheqê rojdemî de Meclîs de kombîyayîşêkê çapemenîye serûber kerd û rojdem ercna. 

Qiseykerdişê Oluçî ra beşêk wina yo:

''Tay meseleyê kedkaranê weşîye estê. Lapikî, maske, verçimikê bi sîperan, maskeya N95î qîm nêkenê. Ganî nê meseleyî bêrê çareserkerdene.  Eke ma wazenê ke vengdayîşê ''Keye de bimanê'' bêro caardene ganî zanayîşê derheqê doneyanê Korona de bi hawayêkê eşkerayî bêrê parekerdene. Ganî rojêke de tewr tay 20 hezar testê vîrusê Korona bêrê kerdene ke ma rewşa rastikêne bimusê. Têna pê vatişê ''Keye de bimanê'' nêbeno, ganî seba naye îmkanî zî bêrê viraştene û seba komelî nê îmkanî bêrê pêşkêşkerdene. No wezîfeyê hukmatî yo.

Vîrusê Korona ra semed rewşa tewpişteyan yena munaqeşekerdene. Heqê weşîye û cuye yê pêro merdiman binê asayîş û mesuldarîya dewlete de yê. Weçînayîşê înfazî de bêtêdûştîyê pîlî estê. Seba sûcanê cîyayan mîktarê ceza yê cîyayî estê. Ma her tim vatêne ke ganî qanûnê înfazî bêro vurîyayene. Nêno qebulkerdene ke merdimê ke fikran, vilakerdişanê medyaya komelkî, eşkerayîyan, qiseykerdişanê xo ra semed komelî ra bêrê dûrvistene. Ma bi hawayêkê qetî îfade kerd ke tepiştey û hukmwerdeyê sîyasîyî ganî teberê nê weçînayîşî de nêrê verdene.''