Şubeyê Ewropa yê Organîzasyonê Têkoşînê Vera Îşkenceyî yê Dinya (OMCT) eşkerayîyêke weşanaye û vera vernîyazê qanûnê dewleta tirke nêrazîbîyayîşê xo mojna ke vernîyaz pandemîya Covid-19î ra derheqê tepişteyan de ame amadekerdene.

Eşkerayîye de ame parekerdene ke vernîyaz qanûno ke seba veradayîşê tepişteyan o labelê tepişteyê sîyasîyî ci ra fayde nêvînenê, cîyatî yo. Eşkerayîye de ame vatene: ''Bi nameyê OMCT, ma venga hukmatê tirkî û qanûnkerdoxan danê ke çarçewa heqanê merdiman de vera tepişteyan cîyatîya sîyasî, etnîk, nîjad û dînîye mekerê.OMCTyî vist vîrî ke kapasîteya zîndananê Tirkîya zêde nîya û zîndanan de 200 hezarî ra zêdêr tepişteyî manenê. Eşkerayîye de ame vatene: ''Neteweyanê Yewbîyayeyan (NY) û Konseya Ewropa (KE) verê cû hem sixletîya zîndanan hem zî şert û mercê zîndananê Tirkîya rexne kerdbi û derheqê babete de qesawetê xo pare kerdbi. Ewro zî sixletîya zîndanan û şert û mercê zîndanan jana Covid-19î ra cuya tepişteyan visnenê binê tehlukeyî.

Eşkerayîye de dîya zanayene ke rojnamegerî, sîyasetmedarî û pawitoxê heqanê merdiman zî tede bi hezaran tepişteyî 'qanûnê têkoşînê vera terorî' ra ameyî tepiştene, ê nêeşkenê vernîyazê qanûnê vera Covid-19î ra fayde bivînê. Eşkerayîye wina dewam keno: ''Na cîyatîya eşkera ya vera tepişteyan a. Eke rewşe bi nê hawayî biba Tirkîya do Peymana Heqanê Merdiman a Ewropa, Peymana Heqan ê Sîyasîyan û Sivîlan a Mîyanneteweyîte û zaf berpirsîyarîyanê xo binpay kena.Eşkerayîye de vengdayîşê Komîsera Berze ya Heqanê Merdiman a Neteweyanê Yewbîyayeyan Michelle Bachelet ê seba dewletan ame vîrvistene ke vatêne: ''Tepişteyê sîyasîyî, mûxalîfî û her kes ganî bêrê veradayene.''

Eşkerayîye de venga Tirkîya ame dayene ke vera tepişteyanê sîyasîyan cîyatîye ra fek vera bida, bi hawayêkê têdûştî nêzdîyê tepişteyan biba, pawitoxanê heqanê merdiman, rojnamegeran, tepişteyanê sîyasîyan ganî cade bêrê veradayene. Eşkerayîye de ame îfadekerdene ke ê do rewşa zîndananê Tirkîya teqîb bikerê û seba hurmetê weşîya şarî û azadîya bingeyîne do têbigêrê.